Laban ni Olsim, nabantilaw, Cleveland, nagka-Vertigo

ni Gerard Arce - @Sports | September 1, 2021

Hindi na mapapabilang sa all-female fight card na ONE: Empower sa Biyernes si Filipina rising star at Team Lakay member Jenelyn Olsim matapos umatras ang nakatakdang kalaban nitong si Grace “Thai Kitten” Cleveland para sa women’s Atomweight alternate bout sa Singapore Indoor Stadium sa Singapore.

Inihayag ng undefeated na 27-anyos na tubong Denver, Colorado na dumanas siya ng matinding pagkahilo sa loob ng isang buwan. Naghihintay pa ito ng resulta ng brain MRI testing at komunsulta na sa ilang propesyunal na physical therapists, neurologists, habang isang doctor ang nagsabing mayroon siyang Benign Paroxysmal Positional Vertigo.

“I’m no longer fighting on Sept 3rd. got all my medicals done for the fight, but I have been experiencing really bad dizziness for the past month. It got to the point where it affected me for 4 days and I literally just had to sit in a position not to spin,” pahayag ni Cleveland sa Instagram post. “Was waiting for my brain MRI and it gave me some information I need to get myself checked out. Been seeing professional PT and a doctor and now have a neurologist appointment. I pray it’s good news and has nothing to do with my prior spinal/neck injury.”

Nakalinya ang tapatan nina Olsim at Cleveland sa malalim at kauna-unahang first female card kasama ang dalawang Filipinang fighters na sina ONE Atomweight no.1 contender Denice “Lycan Queen” Zamboanga ng Marrock Force na sasabak sa 115-pound women’s Grand Prix kontra kay dating UFC fighter at Road FC women’s Atomweight champion “Aracle Chan” Seo Hee Ham ng South Korea bilang co-main event, habang makikipagbuntalan sa women’s strawweight Muay Thai bout si Fil-American Jackie Buntan kabakbakan si Daniela Lopez ng Spain sa lead card event.

Nagpa-abot ng kanyang pag-unawa at mensahe ang 24-anyos na Baguio City native para sa kanyang agarang paggaling, na nagmula sa isang unanimous decision victory laban kay Vietnamese American Bi “Killer Bee” Nguyen sa ONE: Battleground III. “Get well!! Health is more important than anything #MayGodHealsAndBlessYou #TheGraceful,” saad ni Olsim sa kanyang official Facebook page.