La Trouppei, sumikwat ng titulo sa Juvenile

ni Green Lantern - @Renda at Latigo |December 6, 2022

Sinisiw ni La Trouppei ang kanyang mga katunggali upang sikwatin ang titulo sa PHILRACOM "2nd Leg Juvenile Stakes Race na inilarga sa Metro Turf, Malvar sa Batangas noong Linggo ng hapon.

Napasaya ni La Trouppei ang kanyang mga fanatiko dahil sa ipinakita nitong husay sa pagtakbo kung saan ay nakipagtagisan ito ng bilis sa rektahan.

Banatan sa unahan sina Istulen Ola at Secretary, nakatutok sa tersero si Jaguar habang nanonood sa bandang likuran si La Trouppei.

Hindi nagtagal ay nakisali na sa harurutan sa unahan sina Jaguar at La Trouppei at umabot sa huling kurbada ang bakbakan. Kanya-kanyang diskarte ang mga hinete sa rektahan, mainit ang naging labanan kung saan ay halos leeg lang ang pagitan ng panalo ni La Trouppei kay Jaguar.

Nirendahan ni jockey Kelvin Abobo si La Trouppei para irehistro ang tiyempong 1:25 minuto sa 1,400 meter race sapat upang hamigin ng winning horse owner ang P1,080,000 premyo.

Dumating na segundo si Jaguar, nasungkit nito ang P360,000 habang napunta sa third placer na si Istulen Ola ang P180,000 sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Pang-apat si Gintong Hari na nag-uwi ng P90,000 habang P54,000 ang sinikwat ng 5th placer na si Earli Boating.