"Kung saan at kailan, Mclaren, magpatawag ka lang!" Kingad

ni MC - @Sports | June 17, 2022

Narinig ni dating ONE World Title challenger Danny “The King” Kingad ang malakas na panawagan ni Reece McLaren kaya naman handa niyang harapin ang Australian star, anumang oras at araw, petsahan niya lang.

Agad na hinamon ng huli ang Team Lakay na si Kingad matapos ang first-round submission victory niya sa ONE 158 laban kay Xie Wei. Unang nagbasagan ng mukha sina Kingad at McLaren kung saan si “The King” ang nakapag-uwi ng close split decision noong August 2019 clash sa ONE: Daws of Heroes. Iyon ang rematch na nais mangyari ni McLaren.

Sa kabilang banda, wala namang alinlangan ang Team Lakay stalwart sa pagtanggap ng paghamon at nais niyang sa lalong madaling panahon ito mangyari. “I think he doesn’t believe that he lost in our first fight, that’s why he wants that rematch. Knowing Team Lakay and knowing myself, we’re not backing down from anyone. I’m ready if ever we fight each other again. Give me the date and place!” saad ni Kingad.

Nahasa naman si McLaren, isang natural grappler sa kanyang striking skills sa gabay ni legendary Muay Thai kickboxer John Wayne Parr kamakailan sa Boonchu Gym sa Gold Coast. Sa kanyang in-Circle interview kay commentator Mitch Chilson, hindi nag-aksaya ng oras si “Lightning” at nagtawag na agad ng rematch kontra Kingad.

Habang napanood ni Kingad sa telebisyon mula sa Baguio City ang kaganapan, agad siyang nagpadala ng sagot kay McLaren sa social media. “An excellent performance from Reece! He was able to survive the killer right punch of Xie Wei. I was amazed and equally entertained by Reece. He really gave it his all during the fight and submit Xie Wei,” saad ni Kingad.

At dahil halos magkasukat sa kanilang laban noong 2019, bawat isa ay nagsasabing panalo siya kaya naman dapat maikasa ang rematch. At dahil tunay na mandirigma ang Pinoy, sinabi ni "The King" na walang problema kung muling makasagupa ni McLaren sa ibabaw ng Circle.