Kung may copyright ang computer programs

ni Atty. Persida Rueda-Acosta - @Magtanong Kay Attorney | August 1, 2022

Dear Chief Acosta,

Isa akong papasok na estudyante ng Computer Science sa darating na school year. Nais kong malaman kung may copyright din para sa mga computer programs na aking magagawa sa mga susunod na panahon. - Ezekiel

Dear Ezekiel,

Para sa iyong kaalaman, ang batas na nakasasaklaw sa iyong katanungan ay ang Section 172 ng Republic Act No. 8293, as amended o mas kilala sa tawag na Intellectual Property Code of the Philippines kung saan nakasaad na:

“SECTION 172. Literary and Artistic Works. - 172.1. Literary and artistic works, hereinafter referred to as "works", are original intellectual creations in the literary and artistic domain protected from the moment of their creation and shall include in particular:xxx

n. Computer programs; xxx.” (Binigyang diin)

Ayon din sa batas, “computer program is a set of instructions expressed in words, codes, schemes or in any other form, which is capable when incorporated in a medium that the computer can read, of causing the computer to perform or achieve a particular task or result” (Art. 171.4, Id.)

Samakatwid, ang mga computer programs ay itinuturing na original intellectual creation at nasasakop ng batas ng copyright. Alinsunod sa batas, ang mga ito ay tulad ng ibang literary o artistic works, protektado ng batas mula sa pagkakagawa nito sa anumang anyo o porma ng pahayag. (Art. 172.2, Id.) Ibig sabihin, may proteksyon ng batas, bilang copyright, ang mga computer programs na iyong magagawa sa mga darating na panahon.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.