KRIS, BITBIT ANG MAKE-UP ARTIST AT HAIRSTYLIST HABANG NAGPAPAGAMOT SA TATE

ni Erlinda Rapadas - @Teka Nga | July 6, 2022

Patuloy ang pagdarasal ng mga taong nagmamalasakit kay Kris Aquino upang maagapan ang kanyang karamdaman at madugtungan pa ang kanyang buhay.

Ang pinakamagagaling na doktor sa Houston, Texas, USA ang tumitingin ngayon kay Kris. At lahat ay ginagawa ng medical team na nangangalaga sa kanyang kalagayan.

Patuloy ang paglaban ni Kris upang hindi siya maigupo ng kanyang sakit. Pero sa kabila ng delikado niyang kalagayan, may ilan pa rin na pilit na bina-bash si Kris.

Balita kasing kasama niya sa Houston, Texas ang kanyang personal makeup artist at hairstylist. Kaya ang mga larawan na lumalabas sa kanyang social media ay naka-makeup siya dahil ayaw ni Kris na makita siya ng lahat sa kanyang kaawa-awang hitsura ngayon. Kaya kahit nasa ospital siya ay nakasuot siya ng pearl jewelries.

Naniniwala si Kris Aquino na may healing effect ang pagsusuot niya ng mga alahas na perlas.

Anyway, kung ikaliligaya naman ni Kris na makita ang sarili na maganda pa rin kahit maysakit na, walang issue kung magsama siya ng sarili niyang makeup artist at hairstylist habang nagpapagamot sa Houston, Texas.