Kontra-Super El Niño — PBBM... Bumili na kayo ng balde, magkolekta ng ulan

ni Mylene Alfonso @News | October 13, 2026

Photo: Rodrigo Duterte - ICC

Hinikayat ni Pangulong Ferdinand Marcos Jr. ang mga Pilipino na maghanda sa posibleng pagtama ng Super El Niño sa pamamagitan ng pagbili ng mga balde na maaaring pag-ipunan ng tubig-ulan. 

Plano rin ng pamahalaan na mamahagi ng mga water filter at magturo ng tamang paraan ng paglilinis at pag-iimbak ng tubig upang matiyak na ligtas itong gamitin.

Ayon kay Marcos, tuturuan ng pamahalaan ang publiko kung paano salain ang nakolektang tubig-ulan upang maiwasan ang mga sakit na nakukuha sa maruming tubig. 

“Bumili na kayo ng balde para kapag umulan makokolekta na ninyo lahat. Tuturuan namin kayo” wika ni Marcos sa Kapihan with the Media sa Singapore.

“We’ll give you filter. We’ll teach you how to do everything para hindi kayo magkasakit at maayos ang pag-treat ng tubig, pag-filter ng tubig. And it will be healthy for the children,” ayon pa sa Pangulo.

Nabatid na bahagi ang pag-iipon ng tubig-ulan sa paghahanda ng publiko sa posibleng tagtuyot at kakulangan sa suplay ng tubig dulot ng El Niño. 

Inihahanda rin ng pamahalaan ang pagsasagawa ng cloud seeding upang makatulong na madagdagan ang pag-ulan. 

Ang El Niño ay isang potential weather phenomenon na may kaugnayan sa pag-init ng temperatura ng tubig sa central at eastern equatorial Pacific Ocean na maaaring magdulot ng mas kaunting pag-ulan, matagal na tagtuyot at kakulangan sa tubig sa ilang bahagi ng Pilipinas.