Kinuhang gumanap na BBM… DIEGO, TODO-SIGAW NA LOYAL SA MGA MARCOS

ni Nitz Miralles - @Bida | June 14, 2022

Hindi takot ma-cancel si Diego Loyzaga dahil sa isang event para kina President-elect Bongbong Marcos at Vice President-elect Sara Duterte, sa kanyang speech, nagpasalamat ang aktor na kasama siya sa cast ng Viva Films movie na Maid in Malacañang. Hindi lang basta kasama si Diego, siya pa ang gaganap na Bongbong Marcos at tama nga siya, malaking oportunidad ito para sa kanya.

Sabi nito, “Alam ko rin na balang-araw, kung puwede kong suportahan ang pamilya Marcos, susuportahan ko talaga sila. Dumating ang oportunidad na ‘yun at kinuha ko ‘yun at salamat sa Diyos, binigyan niya ako ng oportunidad na gampanan si Presidente Bongbong Marcos sa role sa isang pelikula. I’m happy to be part of this family. Tawagin n’yo rin akong loyalist po.”

Ano kaya ang reaction ng mga fans ni Diego — na si VP Leni Robredo ang sinuportahan sa katatapos na eleksiyon — sa sinabi ng aktor at sa pagiging part niya ng controversial movie directed by Darryl Yap?

Anyway, napili na rin ang mga gaganap na maid sa Malacañang Palace sa nasabing pelikula — si Karla Estrada sa role ni Yaya Santa, si Beverly Salviejo sa role ni Biday, at si Elizabeth Oropesa sa role ni Manang Lucy.