Kaso ng misis na nagbasag ng cellphone ng mister

ni Atty. Persida Rueda-Acosta @Magtanong Kay Attorney | October 27, 2023

Dear Chief Acosta,

Nahuli kong may ka-text na ibang babae ang aking asawa. Sa galit ko sa kanya, hinagis ko ang cellphone niya at nabasag ito. Galit na galit siya dahil sa nangyari at sinabi niyang sasampahan niya ako ng kasong malicious mischief. Maaari ba akong makulong dahil dito? - Grace

Dear Grace,

Ang intensyunal na paghagis at pagsira ng isang cellphone na pag-aari ng iba ay maaaring maituring na Malicious Mischief na ipinagbabawal sa ilalim ng Artikulo 327 ng Revised Penal Code (RPC), na nagsasabing:

“Article 327. Who are liable for malicious mischief. Any person who shall deliberately cause the property of another any damage not falling within the terms of the next preceding chapter shall be guilty of malicious mischief.”

Ngunit, may mga taong hindi saklaw sa pagkakaroon ng kriminal na pananagutan sa mga crimes against property na katulad ng Malicious Mischief. Ayon sa Artikulo 332 ng RPC:

“Article 332. Persons exempt from criminal liability. — No criminal, but only civil liability, shall result from the commission of the crime of theft, swindling or malicious mischief committed or caused mutually by the following persons:

1. Spouses, ascendants and descendants, or relatives by affinity in the same line;

2. The widowed spouse with respect to the property which belonged to the deceased spouse before the same shall have passed into the possession of another;

3. Brothers and sisters and brothers-in-law and sisters-in-law, if living together.

The exemption established by this article shall not be applicable to strangers participating in the commission of the crime.”

Malinaw sa nabanggit na probisyon ng batas na ang asawa ay kabilang sa mga taong walang kriminal na pananagutan sa mga crimes against property. Sa iyong sitwasyon, dahil mag-asawa kayo, hindi ka maaaring papanagutin sa kasong kriminal na Malicious Mischief sa ginawa mong paghagis sa cellphone ng iyong asawa. Gayunpaman, may sibil na pananagutan ka kaugnay sa halaga ng nasirang gamit ng iyong asawa dahil ang exemption na itinatakda ng RPC ay para lamang sa kriminal na aspeto ng pananagutan.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa inyong patuloy na pagtitiwala.