Ang benepisyo at tulong na dulot ng “Simulated Birth Rectification Act"

ni Atty. Persida Rueda-Acosta - @Magtanong Kay Attorney | July 31, 2022

Kamakailan ay ating nailathala ang benepisyo at tulong na dulot ng bago lamang na naipasang batas tungkol sa administratibong proseso ng pag-aampon o ang Republic Act Number 11642.

Gayunman, marami ang nagtatanong — paano ang sitwasyon ng mga nameke ng birth record ng bata o nag-simulate ng kapanganakan alang-alang sa kapakanan at ikabubuti ng bata?

Marahil, marami ang magsasabi na kailanman ay hindi maaaring maging katwiran sa paggawa ng kamalian ang tila mabuting layunin. At ito naman ay nararapat at hindi mahirap intindihin sapagkat ang pagkakakilanlan at estado ng tao ang nakasalalay at naaapektuhan kapag nagkakaroon ng simulation ng birth o kapanganakan. Sa katunayan, para sa inyong kaalaman, ang akto ng pag-simulate ng birth o pamemeke ng birth record ay itinuturing na krimen na may karampatang kaparusahan.

Sa kabila ng mga nabanggit, hindi pa rin maipagkakaila na may mga sitwasyon pa rin ng simulation ng kapanganakan na masasabing produkto lamang ng kahirapan at pagpapaubaya para sa kapakanan ng bata. Tulad nang ating naunang naibahagi tungkol sa administratibong proseso ng pag-aampon na sadyang naging pagtugon ng ating pamahalaan sa mga dagok na kasunod ng judicial na proseso sa pag-aampon; ang Republic Act (R. A.) No. 11222 o mas kilala sa tawag na “Simulated Birth Rectification Act” naman ang naging tugon ng ating pamahalaan para sa mga sitwasyon kung saan ang kapakanan at ikabubuti naman ng kabataan ang natatanging konsiderasyon sa simulation.

Ayon sa Seksyon 2 ng nasabing batas, layunin ng Simulated Birth Rectification Act ang mga sumusunod:

Seksyon 2. Mga Layunin. – Layunin ng batas na ito ang mga sumusunod:

(a) Magbigay ng amnestiya at payagan ang pagwawasto ng simulated na kapanganakan ng isang bata kung saan ginawa ang simulation para sa kapakanan at pinakamahusay na interes ng bata, x x x;

(b) Ayusin ang katayuan at estado ng isang bata na ang kapanganakan ay na-simulate sa pamamagitan ng pagbibigay sa naturang bata ng lahat ng mga benepisyo dulot ng pag-aampon at pagtiyak na ang bata ay may karapatan katulad sa lahat ng mga karapatan na itinatadhana ng batas sa mga legal na inampon x x x;

(c) I-exempt sa kriminal, sibil, at administratibong pananagutan ang mga responsable sa pag-simulate sa rekord ng kapanganakan ng isang bata; at

(d) Magbigay at payagan ang isang mas simple at hindi gaanong magastos na administratibong pag-aampon.

Kaugnay ng mga nabanggit na layunin at katambal na rin ng kamakailan na batas na nagbigay-daan sa administratibong pamamaraan ng pag-aampon, binibigyan ng amnestiya ng batas at hindi na mahaharap sa mga kasong kriminal, sibil at administratibo ang taong nag-simulate ng birth ng isang bata kung ang mga sumusunod na rekisito ay mapatutunayan:

Ang simulation ay ginawa para sa kapakanan at pinakamahusay na interes ng bata;

Ang bata ay patuloy na isinasaalang-alang at tinatrato bilang kanilang sariling anak na babae o anak na lalaki:

Nag-file ng petisyon para sa pag-aampon (administratibo) sa loob ng sampung taon mula sa pagsasabatas ng R. A. No. 11222 o mula ika-10 ng Disyembre taong 2019 hanggang ika-29 ng Marso 2029; at

Ang bata ay nakatira kasama ang mag-aampon nang hindi bababa sa tatlong (3) taon bago ang bisa ng R. A. No. 11222. (Tingnan ang Seksyon 4 at 5 ng R. A. No. 11222 at ang Department of Social Work and Development Memorandum Circular No. 16, s. 2020)

Pakatandaang mabuti na kinakailangan na ang “Petition for Adoption With An Application For The Rectification Of The Simulated Birth Record” ay maisasampa sa loob ng sampung taon mula nang naging epektibo ang batas na ito.

Alinsunod sa mga nabanggit, kung papasok ang sitwasyon ng nag-simulate ng kapanganakan sa mga nasabing rekisito, hindi lamang mabibigyan ng kapatawaran at amnestiya ang nasabing aktor sa kanyang mga nagawa, bagkus at higit sa lahat — ang kapakanan ng bata ay mas mapagtitibay sa pamamagitan ng pagbibigay-selyo at kasiguraduhan sa kanyang estado bilang anak at pagbibigay-daan kalinawan, at katapatan sa pinagmulan ng bata.

Samakatwid, sa tulong ng Simulated Birth Rectification Act, ang karapatang malaman ang kanyang tunay na pagkakakilanlan at matamasa ang mga karapatan kaakibat ng pagiging tunay na anak nang walang halong pag-iimbot at pag-aalinlangan ay abot kamay na.