Karapatan ng family driver sa separation pay

ni Atty. Persida Rueda-Acosta - @Magtanong Kay Attorney | November 12, 2021

Dear Chief Acosta,

Ako ay family driver at ako ay nagtrabaho sa loob ng 20 taon sa aking amo. Noong nakaraang buwan ay tinanggal ako sa trabaho dahil diumano hindi na ako kailangan ng bilang driver. Gusto kong malaman kung may karapatan ba ako sa separation pay katumbas ng mga taon ng aking serbisyo? – Lando

Dear Lando,

Ang batas na sumasaklaw tungkol sa inyong katanungan ay ang Republic Act No. 386, o mas kilala bilang The Civil Code of the Philippines. Nakasaad sa Article 1697 ng nasabing batas na:

“Article 1697. If the period for household service is fixed neither the head of the family nor the house helper may terminate the contract before the expiration of the term, except for a just cause. If the house helper is unjustly dismissed, he shall be paid the compensation already earned plus that for fifteen days by way of indemnity. If the house helper leaves without justifiable reason, he shall forfeit any salary due him and unpaid, for not exceeding fifteen days.”

Ang mga probisyon ng Presidential Decree (P. D.) No. 442 o mas kilala bilang Labor Code of the Philippines kaugnay sa mga empleyado na kabilang sa “domestic or household sevice” ay napawalang-bisa noong maipasa ang Republic Act (R. A.) No. 10361 o mas kilala bilang “Domestic Workers Act” o “Batas Kasambahay”. Subalit, malinaw na nakasaad sa Implementing Rules and Regulations ng Batas Kasambahay na ang mga family drivers ay hindi sakop ng mga probisyon nito. Samakatwid, ang probisyong nabanggit sa itaas ang siyang angkop sa inyong sitwasyon.

Inilahad ng Korte Suprema sa kaso ng Atienza vs. Saluta (G.R. No. 233413, June 17, 2019, Ponente: Honorable Associate Justice Jose C. Reyes, Jr.) na:

“Since what were expressly repealed by the Kasambahay Law were only Articles 141 to 152, Chapter III of the Labor Code on Employment of Househelpers; and the Labor Code did not repeal the Civil Code provisions concerning household service which impliedly includes family drivers as they minister to the needs of a household, the said Civil Code provisions stand. To rule otherwise would leave family drivers without even a modicum of protection.

Certainly, that could not have been the intent of the lawmakers.”

(Binigyang-diin)

Samakatwid, bilang family driver na ilegal na tinanggal sa serbisyo, ikaw ay kailangang bayaran ng inyong suweldo para sa mga araw na inyong pinasukan, at karagdagang suweldo na katumbas ng 15-araw na trabaho.

Nawa ay nasagot namin ang inyong mga katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyon na ibibigay. Mas mainam kung personal kayong sasangguni sa abogado.

Maraming salamat sa inyong patuloy na pagtitiwala.