Karapatan ng empleyado sa sapilitang overtime

ni Atty. Persida Rueda-Acosta @Magtanong Kay Attorney | January 12, 2026

Dear Chief Acosta,

Nitong mga nakaraang araw ay madalas kaming pinag-o-overtime ng boss namin nang walang sapat na dahilan. Kadalasan, kahit tapos na ang trabaho namin ay hindi pa rin kami pinahihintulutan na umalis ng opisina hangga’t hindi siya tapos sa kanyang sariling Gawain. Dahil dito, kadalasan ay wala naman kaming aktuwal na ginagawa tuwing pinag-o-overtime kami. Legal ba na panatilihin kami sa opisina para mag-overtime kahit walang sapat na dahilan? — Kate

---

Dear Kate,

Sang-ayon sa Article 83 ng Labor Code, ang normal na oras ng trabaho ng isang empleyado ay dapat walong oras lamang kada araw. Anumang oras ng paggawa na lampas sa walong  oras sa isang araw ay itinuturing bilang overtime na trabaho na napapailalim sa mga itinakdang kondisyon at limitasyon. 

Ang mga alituntunin sa overtime sa trabaho ay nakalahad sa Section 10, Rule I, Book III ng Omnibus Rules Implementing the Labor Code. Dito ay nakasaad na:

“SECTION 10. Compulsory overtime work. — In any of the following cases, an employer may require any of his employees to work beyond eight hours a day, provided that the employee required to render overtime work is paid the additional compensation required by these regulations:

1. When the country is at war or when any other national or local emergency has been declared by Congress or the Chief Executive;

2. When overtime work is necessary to prevent loss of life or property, or in case of imminent danger to public safety due to actual or impending emergency in the locality caused by serious accident, fire, floods, typhoons, earthquake, epidemic or other disaster or calamities;

3. When there is urgent work to be performed on machines, installations, or equipment, in order to avoid serious loss or damage to the employer or some other causes of similar nature;

4. When the work is necessary to prevent loss or damage to perishable goods;

5. When the completion or continuation of work started before the 8th hour is necessary to prevent serious obstruction or prejudice to the business or operations of the employer; or

6. When overtime work is necessary to avail of favorable weather or environmental conditions where performance or quality of work is dependent thereon.

In cases not falling within any of these enumerated in this Section, no employee may be made to work beyond eight hours a day against his will.”

Sa mga kaso na hindi kabilang sa alinman sa mga binanggit na seksyon, walang empleyado ang maaaring pilitin magtrabaho ng lampas sa walong oras sa isang araw na labag sa kanyang kalooban. Ang walong oras na paggawa ay itinakda upang matiyak ang kapakanan ng mga empleyado, na nagsusulong sa kanilang balanseng buhay at trabaho. 

Bagama't hindi pinipigilan ng mga alituntunin ang pamunuan ng isang negosyo na obligahin ang pag-o-overtime sa trabaho, ito ay dapat ipatupad lamang kung may wastong batayan katulad ng mga nabanggit sa itaas. Hindi ito basta-basta maaaring ipataw sa isang empleyado. Kaya, sa iyong kaso, maaaring talakayin sa iyong boss ang dahilan kung bakit hinihiling sa inyo na patagalin ang inyong pamamalagi nang lampas sa karaniwang oras ng trabaho.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.