Kapangyarihan ng SEC na magtanggal ng director, trustee o officer ng isang kompanya

ni Atty. Persida Rueda-Acosta - @Magtanong Kay Attorney | April 25, 2022

Dear Chief Acosta,

Ako po ay nagkaroon ng kaso na kung saan, ako ay nahatulan ng pagkakakulong na mahigit na sampung taon, at ito ay akin nang pinagdusahan. Isang taon matapos akong makalaya, at sa kabila ng aking naging sitwasyon, ako ay pinagkatiwalaan pa rin ng stockholders ng aming kompanya kaya ako ay kanilang inihalal bilang isang director. Sa mahigit 100 stockholders, may lima sa kanila na nagsumite ng reklamo sa Securities and Exchange Commission (SEC) upang ako ay mapatanggal bilang isang director. Maaari po ba iyon?

Eric

Dear Eric,

Ang batas na nakasasaklaw patungkol sa inyong katanungan ay ang Republic Act (R. A.) No. 11232 o mas kilala bilang Revised Corporation Code of the Philippines. Nakasaad sa Sections 26 at 27 ng nasabing batas:

“SEC. 26. Disqualification of Directors, Trustees or Officers. – A person shall be disqualified from being a director, trustee or officer of any corporation if, within five (5) years prior to the election or appointment as such, the person was:

(a) Convicted by final judgment:

(1) Of an offense punishable by imprisonment for a period exceeding six (6) years;

SEC. 27. Removal of Directors or Trustees.

[…] The Commission shall, motu proprio or upon verified complaint, and after due notice and hearing, order the removal of a director or trustee elected despite the disqualification, or whose disqualification arose or is discovered subsequent to an election. The removal of a disqualified director shall be without prejudice to other sanctions that the Commission may impose on the board of directors or trustees who, with knowledge of the disqualification, failed to remove such director or trustee.” (Binigyang-diin)

Ayon sa mga nabanggit na probisyon ng batas, ang Securities and Exchange Commission (SEC), ay may kapangyarihan, motu proprio, o sa bisa ng isang verified complaint, at alinsunod sa proseso na itinalaga ng batas, na mag-utos sa pagpapatanggal sa isang director o trustee ng isang kompanya na nahalal bagama’t hindi kwalipikado. Nakasaad din sa nasabing batas na ang SEC ay maaaring magpataw ng kaparusahan sa mga miyembro ng board of directors o trustees, na sa kabila ng kanilang kaalaman patungkol sa nasabing diskwalipikasyon, ay bigo na matanggal ang hindi kwalipikadong director o trustee.

Sana ay nabigyan namin ng linaw ang inyong katanungan. Ang payong aming ibinigay ay base lamang sa mga impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.