Kandidatong lalabag sa protocols, dapat lang managot
ni Ryan Sison - @Boses | December 14, 2021
Wala pa mang opisyal na kampanya, kapansin-pansing aktibo na ang mga kandidato sa paglilibot sa bansa.
Halos araw-araw, may nagaganap na motorcade o caravan sa iba’t ibang lugar, kaya naman, maraming tagasuporta rin ang nag-aabang upang maiparamdam ang kanilang suporta sa napupusuang kandidato.
Kaugnay nito, inanunsiyo ni Interior Secretary Eduardo Año na maglalabas siya ng guidelines para sa mga lokal na pamahalaan kaugnay sa pangangampanya ng mga kandidato sa susunod na taon dahil ang mga caravans at motorcade na isinasagawa ng mga kandidato ay nagdudulot ng trapik at paglabag sa minimum public health protocols.
Nilinaw din ng kalihim na napagkasunduan na isang linya lamang sa mga pangunahing lansangan ang gagamitin ng motorcades o caravans, magtatalaga ng assembly area, walang programa at patuloy lamang ang daloy ng mga kalahok.
Habang hinggil naman sa mga paglabag sa health protocols, sinabi ng kalihim na dapat kumilos ang LGU dahil kung hindi, sila ang papanagutin.
Samantala, nagbabala ang Metropolitan Manila Development Authority (MMDA) sa mga lalabag sa umiiral na guidelines sa pagsasagawa ng rally o motorcade sa mga lugar na sakop ng Metro Manila na kanilang titiketan ng ‘jaywalking’ o ‘obstruction’ ang mga kasama sa caravan rally.
Tila hindi na nga mapigilan ang mga kandidato at tagasuporta dahil maraming lugar na ang narating ng kanilang motorcade.
‘Yun nga lang, hindi maiwasan ang pagdagsa ng mga supporter kaya nauuwi sa siksikan.
Bagay na ikinababahala ng mga awtoridad dahil pa rin sa banta ng COVID-19 at kahit patuloy na pagbaba ng naitatalang arawang kaso ng sakit.
Kaya naman, pakiusap sa mga awtoridad, ‘pag may lumabag, panagutin ang mga dapat managot — kandidato man, organizer o tagasuporta. Paraan ito upang hindi na maulit at hindi tularan.
Ngayon n’yo patunayan na may ngipin ang batas at wala tayong pinipili.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com
Comments