Kahit naging misis ang Superstar… RICHARD MERCK, ‘DI PINAMANAHAN NI NORA

ni Erlinda Rapadas @Teka Nga | July 27, 2026

Photo: FB Circulated

Nakausap namin recently si Richard Merck nang pumasyal ito sa Kamuning Bakery Cafe kasama ang kanyang misis. At dahil nababalita na isa siya sa pinamanahan ng yumaong Superstar at National Artist na si Nora Aunor, natanong namin siya tungkol dito.

Open naman sa showbiz na naging misis ni Merck si Nora. Nagulat nga siya dahil hindi siya aware tungkol sa isyu ng mana.

Itinanggi ni Merck na may iniwang mana ang Superstar sa kanya. Ikinalungkot at nanghinayang siya sa pagpanaw nito. Napabayaan ni Nora Aunor ang kanyang kalusugan.

Nabanggit din namin kay Merck ang tampuhang namagitan sa magkakapatid na Ian, Lotlot at Matet dahil sa isyu ng pamanang naiwan. Pero sa bahaging ito ay hindi raw siya nakikialam sa usapin ng mga anak.

Nagkakausap naman daw sina Merck at Ian de Leon, at may communication din sila ni Matet.

Ngayon, 70 years old na siya at nagso-show sa mga casino. Medyo pumayat lang siya ngayon, pero tahimik at masaya ang kanyang buhay. 

Dalawa ang naging anak ni Richard sa una niyang misis na yumao na.

---

TEENAGER na ngayon si Ellie, ang anak nina Jake Ejercito at Andi Eigenmann, kaya doble ang ibinibigay na atensiyon at pangangalaga sa kanya. Marami nang pagbabago kay Ellie ngayong nagdadalaga na siya.

Nasubaybayan ni Jake ang mga kaganapan sa buhay ni Ellie mula nang ito’y bata pa. Magkasama silang nagbabakasyon abroad tuwing summer break sa school ni Ellie. Pati sa pag-aaral ay natutukan ni Jake ang anak.

Maganda rin ang setup ng co-parenting nila ni Andi. Minsan, kapag summer vacation ay namamalagi si Ellie sa Siargao upang makapiling ang kanyang mommy at ang dalawa niyang kapatid.

Samantala, maraming kaibigan ni Jake Ejercito ang nagsasabing nakalimutan na nito ang love life dahil sa pag-aasikaso kay Ellie. Umiikot na lang ang mundo ng aktor sa kanyang unica hija.

Nagpapasalamat naman si Andi kay Jake dahil napalaki nito nang maayos ang kanilang anak. Napakabait at mapagmahal nito.

---

Iniwan man ng ilang showbiz friends….

ARNELL, SUPORTADO NG MGA OFWS

INAMIN ni Arnell Ignacio na may mga dati siyang kaibigan na lumayo at dumistansiya sa kanya nang magkaroon siya ng problema sa Overseas Workers Welfare Administration (OWWA), kaya hindi niya maiwasang magtampo sa mga ito.

Gayunman, may mga kaibigan naman sa showbiz na dumamay sa kanya nang dumating ang matitinding pagsubok sa kanyang buhay. Unang-una na rito ang King of Talk na si Boy Abunda. Tumawag daw si Abunda at kinumusta siya.

Maging sina Ai Ai delas Alas, Janice de Belen at Edu Manzano ay dinamayan si Arnell. Nagbigay din ng moral support ang maraming OFWs (Overseas Filipino Workers) na nag-text at nagme-message sa kanya at pinalalakas ang kanyang loob.

Regular ding dumadalaw ang mga non-showbiz friends ni Arnell sa kanyang lugawan sa Marikina upang siya ay aliwin at patawanin. Kahit paano ay nababawasan ang kanyang depression at stress sa buhay.

Sa likod ng kanyang pagiging komedyante, may panahon ding naaapektuhan siya ng mga intriga at problema. Pero patuloy siyang bumabangon at lumalaban.

Thankful si Arnell sa mga OFWs na ipinagdarasal na malagpasan niya ang mga pagsubok sa buhay.

---

MARAMING viewers ng The Master Cutter (TMC) ang nakikiusap sa writer ng serye na huwag munang patayin ang character ni Shuvee Etrata bilang si Tonet. Marami kasi ang naaaliw sa kanya, kuwelang-kuwela ang aktres at may pagka-kikay pa.

Tiyak na ikalulungkot nina Ibyang (Sienna Stevens) at Ate Eme (Jo Berry) kapag nawala si Shuvee sa TMC. Siya ang makakatuklas ng tunay na pagkatao ng anak nina Audrey (Max Collins) at Natoy (Dingdong Dantes).

Bigyan pa raw ng extension ang exposure ni Shuvee sa serye. 

Well, kailan kaya papasok ang character ni Jennylyn Mercado?