Biglang sorry nang mahimasmasan… ELLEN, NAGTA-TUMBLING NANG MALASING SA CEBU

ni Erlinda Rapadas @Teka Nga | October 24, 2026

Photo: Ellen Adarna - IG

Hindi na inaasahan ng marami na magkakabalikan pa sina Ellen Adarna at Derek Ramsay. Tinuldukan na ng dating aktres ang kanilang relasyon at mas pinili niyang manatiling single.

Isang taon na silang hiwalay at hindi pa nag-e-entertain ng mga bagong manliligaw si Ellen. Ang tanging ugnayan na lang nila ay ang co-parenting arrangement para sa anak nilang si Lily. 

Hindi ipinagkakait ni Ellen na mahiram ni Derek ang kanilang anak. Nitong 2nd birthday nito, nakasama ni Derek ang kanyang little princess. Mahal na mahal ng aktor si Lily dahil marami raw itong binago sa kanyang buhay.

Samantala, shocked ang maraming netizens sa pinaggagawa ni Ellen nang minsang malasing ito sa isang fiesta sa Cebu. Naka-post pa ang video sa social media. Mistulang acrobat na nagpa-tumbling-tumbling si Ellen. 

Ganunpaman, agad naman siyang nag-sorry nang mahimasmasan sa kanyang ginawang kahiya-hiya.

Anyway, maging si Derek ay nagulat din siguro at hindi makapaniwalang nagawa iyon ni Ellen nang malasing ito. Pero wala naman siyang negative comment sa kanyang ex-wife.

---

Kahit 3 ang shows sa GMA-7, laban lang!

MICHAEL V., SWAK NA KAPALIT NI DINGDONG SA FAMILY FEUD

PANATAG ang loob ni Dingdong Dantes kahit pansamantala niyang iniwan ang pagiging host ng Family Feud (FF). Malaki ang tiwala niya sa kakayahan ni Michael V. 

So far, maganda ang feedback ng mga viewers sa game show. Magaan ang atake ni Michael V. sa pagiging host dahil may halong comedy, kaya kampante ang mga contestants. Mahusay niyang naitatawid ang FF. 

Sabi nga, nasa tamang tao ang game show at consistent pa rin ang mataas na ratings. Kaya walang dapat alalahanin si Dong kung pansamantala siyang nag-health leave, kahit tatlo ang shows na hawak ni Bitoy. 

Gaano man kaabala si Michael V. sa Bubble Gang at sa sitcom na Pepito Manaloto, kinakarir din niya ang pagho-host ng FF.

Tama lang na si Bitoy ang napiling pansamantalang humalili kay Dingdong. Napaka-professional nito sa trabaho, kaya patuloy siyang kinikilala bilang isang magaling na comedian at host.

---

TIYAK na matutuwa at kikiligin ang mga Vilmanians sa 42nd Philippine Movie Press Club (PMPC) Star Awards for Movies. Si Vilma Santos-Recto kasi ang gagawaran ng Hall of Fame Award bilang Movie Actress of the Year dahil sampung beses na siyang nanalo sa kategoryang ito.

Kaya naman, dalawang aktor ang manghaharana sa kanya bago niya tanggapin ang kanyang award. Ang dating ka-love team ni Vilma na si Edgar ‘Bobot’ Mortiz at ang matalik niyang kaibigan na si Tirso Cruz III ang magbibigay ng musical tribute sa Star for All Seasons.

Samantala, ang Megastar na si Sharon Cuneta ay tatanggap ng Nora Aunor Ulirang Artista Lifetime Achievement Award bilang pagkilala sa kanyang mga kontribusyon sa industriya ng pelikula. Ang anak ni Shawie na si Kakie Pangilinan ang kakanta ng mga pinasikat niyang awitin noon. Ito na rin ang tatanggap ng award ni Sharon.

Well, tiyak na star-studded ang 42nd PMPC Star Awards for Movies na gaganapin sa Winford Hotel bukas, October 25. Ito ay produced ni Jojo Mendrez in collaboration with Playtime.

Misis ng negosyante, binati raw, pero… PAMILYA NI VINCENT, NO SHOW SA B-DAY SALU-SALO NI BEA

ni Erlinda Rapadas @Teka Nga | October 22, 2026

Photo: FB Circulated

Nag-celebrate ng kanyang 39th birthday si Bea Alonzo sa intimate na salu-salo sa isang Chinese resto kasama ang kanyang pamilya at malalapit na kaibigan. 

Naroroon ang kanyang inang si Mary Anne, kapatid na si James at hipag na si Thalia Agbayani, anak ng komedyanteng si Bayani Agbayani. Dumalo rin sa birthday get-together ni Bea ang ilan sa kanilang mga non-showbiz friends ng mister niyang si Vincent Co.

Pero may mga netizens na nakapansin base sa mga larawang naka-post na wala ni isa man sa partido ng mister niya ang dumalo sa birthday party. 

Hindi tuloy maiwasang isipin ng iba na hindi pa ganap na tanggap si Bea ng pamilya ni Vincent.

Ganunpaman, may nagsasabi naman na binati nila si Bea sa kaarawan nito, pero sobrang busy sa kanilang mga negosyo kaya hindi nakadalo.

Pero hindi ito issue sa aktres dahil hindi naman siya sentimental na tao. In fact, may pagka-nonchalant nga ito at ayaw ng mga drama sa buhay.

Ang mahalaga ay kapiling niya si Vincent Co sa kanyang kaarawan.

---

Naging inspirasyon ng Asia’s Songbird… 

REGINE, ‘DI MALIMUTANG PINALAYAS SA TENT NANG MAG-GUEST SA SHOW

NAPAKAINIT ng pagtanggap sa three-day FINALE concert ni Regine Velasquez na ginanap sa SM Mall of Asia (MOA) Arena. 

Maraming celebrities ang nanood at marami ang nagsabing hindi pa dapat magretiro sa singing career ang Asia’s Songbird. Kahit hindi na niya kayang bumirit gaya ng dati, naipapakita pa rin ang husay niya.

Iba-iba ang mga kantang inawit ni Regine sa bawat araw ng concert, gayundin ang kanyang celebrity guests, kaya sulit na sulit ang panonood ng FINALE.

Medyo naging emosyonal si Regine nang magpasalamat sa mga taong tumulong sa kanyang career.

Big surprise naman ang reunion nila nina Mikee Cojuangco at Donna Cruz, na nakasama niya sa pelikulang Do Re Mi. Makalipas ang maraming taon, nananatili pa rin ang kanilang friendship.

Noong Day 2 ng concert, si Jose Mari Chan ang celebrity guest.

Sa kabila ng tagumpay na tinatamasa niya ngayon, hindi pa rin nalilimutan ni Regine na minsan siyang pinaalis sa tent ng mga artista noong nag-guest siya sa isang show. 

Sa halip na magtanim ng sama ng loob, ginawa niya itong inspirasyon upang magsikap at abutin ang kanyang mga pangarap.

---

HINDI naging madali kina Kylie Padilla at Miguel Tanfelix ang kanilang role sa action seryeng Taskforce Firewall (TF). Mas pisikal ang hirap na kanilang pinagdaanan kumpara sa mga madramang seryeng una nilang ginawa, lalo na sa mga eksena ng pagtugis sa mga sindikato at scammers. Minsan ay buwis-buhay pa ang kanilang mga eksena.

Pero sulit naman ang kanilang effort dahil kahit saang regional shows sila pumunta, TF ang isinisigaw ng mga tao. Patunay lamang ito na nagmarka sa mga viewers ang kanilang serye sa GMA-7.

Markado rin ang role nina Jak Roberto, Kyline Alcantara at Buboy Villar. 

Isa naman sa mga pinakakinaiinisang characters sa serye ay si Martin (Luis Hontiveros), na isa ring agent ng Firewall. Pinag-iinitan niya sina Galo (Miguel) at Hex (Jak Roberto). In fairness, mahusay siyang kontrabida.

Hindi na sina Gerald, Daniel, Richard at James… DONNY, BAGONG HEARTTHROB NA PANTASYA NG KABABAIHAN

ni Erlinda Rapadas @Teka Nga | October 22, 2026

Photo: Donny Pangilinan - IG

Hindi na sina Gerald Anderson, Daniel Padilla, Richard Gutierrez at James Reid ang pinagpapantasyahan ngayon ng mga kababaihan. 

Ang hottest heartthrob ngayon at pinagkakaguluhan kahit saan magpunta ay si Donny Pangilinan. Iba raw ang appeal ng anak nina Maricel Laxa at Anthony Pangilinan.

Bukod sa kanyang good boy image, ramdam ng lahat ang pagiging mabait, marespeto, humble at pagka-down-to-earth ni Donny. Wala siyang kaere-ere at matulungin sa kapwa, pati na sa mga kasamahan niya sa showbiz.

Mature rin ang mindset ni Donny dahil masinop siya sa paghawak ng kanyang kinikita. Maaga siyang natutong mag-invest sa negosyo bukod sa mga real estate. 

Balak niyang mag-franchise ng sikat na grab-and-go coffee at meron siya ngayong Analog MNL Coffee Bar.

Well, ang kanyang kinikita sa showbiz ay maingat niyang hinahati-hati para sa kanyang savings, investments, personal needs at meron din para sa charity. 

Maganda ang naging pagpapalaki kay Donny ng parents niya, kaya karapat-dapat siyang maging idolo ng mga kabataan.