Kahit 'di naka-graduate… VHONG, NO REGRETS NA NAGING BATANG AMA

ni Ador V. Saluta @Adore Me! | February 27, 2024

Sa isang episode ng It's Showtime segment na EXpecially For You, pinayuhan ni Vhong Navarro ang isang contestant na nag-share na tutol daw ang kanyang ama na may karelasyon siya at a young age.

Sabi ni Vhong, “Mas maa-appreciate mo ‘yung mga magulang mo kapag magulang ka na rin. Kasi nu’ng time na ‘yung anak ko ay teen-ager na, talagang sinasabi ko na, ‘Naku, mag-aaral muna!’ Kasi nu’ng time ko, maaga rin akong nagkaanak. Sinasabi ko sa sarili ko na kung hindi ako nagkaanak kaagad, baka nakapagtapos ako kaagad ng pag-aaral, mas nae-enjoy ko pa ‘yung pagiging binata.” 

Para kay Vhong, hindi naman daw niya pinagsisisihan na siya'y naging ama nang mas maaga.

“Pero hindi ako nagsisisi na naging tatay ako nang maaga kasi minahal ko sila, hindi ko sila pinabayaan. Ang akin lang, sana, mag-aral din muna. Darating at darating din ‘yang mamahalin mo. Huwag kang magmadali,” payo pa ni Vhong. 

Marami naman ang humanga kay Vhong sa kanyang sinabi.

Sa ngayon ay proud si Vhong na ang isa niyang anak na si Yce ay bahagi na ng Batang Quiapo na pinagbibidahan ni Coco Martin.

Si Yce ay anak ni Vhong sa unang karelasyong si Bianca Lapus, dating aktres na ngayon ay negosyante na.