JUDAY, GAME MAGTRABAHO SA GMA-7

ni Erlinda Rapadas @Teka Nga | June 18, 2023

Sa kanyang guesting sa Fast Talk with Boy Abunda, nabanggit ni Judy Ann Santos na may posibilidad na tumanggap siya ng project sa GMA Network.

Nakagawa na siya noon ng pelikula sa GMA Films, ang Ouija at okey naman ang naging relasyon niya sa Kapuso Network.

Open din si Juday sa pagsasama nila ni Claudine Barretto sa isang movie project. Feeling ni Judy Ann, dumating na ang tamang panahon upang magkasama at magkatrabaho sila ni Claudine. Tiyak na magiging masaya ang kanilang mga fans.

Dati-rati ay mahigpit na magkaribal sa popularidad sina Juday at Claudine.

Pinagsasabong sila ng mga fans dahil sa titulong Drama Queen sa bakuran ng ABS-CBN.

Pero sa interview ni Claudine nang mag-guest siya sa Fast Talk with Boy Abunda, sinabi niyang naging magkaibigan sila ni Juday at ito raw ang nagbigay sa kanya ng moral support noong panahon na marami siyang problemang pinagdaraanan.

Ngayong hindi na uso ang awayan ng mga fans, wish din ni Claudine na magkasama sila ni Judy Ann sa isang project. Magandang ideya ito at tiyak na bongga ang promo kapag ito ay natuloy.