Istulen at Winner Parade lalarga sa Juvenile Stakes

ni Green Lantern - @Renda at Latigo |November 17, 2022

Magtutulungan sina Istulen Ola at Winner Parade sa magaganap na 2nd Leg Juvenile Stakes Race na ilalarga sa Metro Turf, Malvar - Tanauan City, Batangas sa Disyembre 4.

Sasakyan ni class A rider John Alvin Guce si Istulen Ola habang si former Philippine Sportswriters Association, (PSA) Jockey of the Year awardee Patricio Ramos Dilema ang rerenda kay Winner Parade sa distansiyang 1,400 meter race,

Ang ibang nagsaad ng pagsali sa event na suportado ng Philippine Racing Commission, (PHILRACOM) sa pamumuno ni chairman Reli De Leon ay sina Earli Boating, Gintong Hari, Grand Monarch, Jaguar, La Trouppei, Light Bearer, Orange Bell, Rough Cut at Secretary.

Nakalaan ang P1.8-M garantisadong premyo na ipamumudmod sa unang 6 na kabayong tatawid sa finish line kaya naman tiyak na maghahanda ng todo ang mga trainer at jockey.

Kukubrahin ng mananalong kabayo ang P1,080,000 premyo, mapupunta ang P360,000 sa second placer, P180,000 sa third habang tig-P90,000, P54,000 at P36,000 ang fourth hanggang sixth ayon sa pagkakahilera.

Magbubulsa rin ng P90,000 ang winning breeder, P54,000 sa second at P36,000 sa third.

Ayon sa komento ng mga karerista sa social media, magandang laban ang kanilang masisilayan kapag lahat ng nominado ay sasali.

Samantala, paniguradong magaganda ang mga lineup sa karera dahil halos tuwing linggo ay may stakes races na pakakawalan sa pista.