Iskedyul ng Eala vs. Stoiana inatras sa Miyerkules Set. 2

by Gerard Arce @Sports News | August 30, 2026

Photo: Circulated

Naatras ang inaabangang first round match nina No.17th seed Filipina tennis star Alexandra “Alex” Eala kontra sa beteranong collegiate champion na si Mary Stoiana ng US sa Miyerkules ng umaga sa Louis Armstrong Stadium sa USTA Billie Jean King National Tennis Center sa Queens, New York City.

Gaganapin ang unang hambalos sa ganap na alas-8:40 ng umaga (oras sa Pilipinas) para sa huling banatan sa first round, kung saan masisilayan din ang paluan nina Mirra Andreeva at Indonesian Janice Tjen sa alas-12:40 ng madaling araw sa Louis Armstrong at nina Zeynep Sonmez ng Turkey kontra fourth seed Coco Gauff ng US sa alas-7:00 ng umaga sa Arthur Ashe Stadium.

Huling beses nagtapat sina Eala at Stoiana makalipas ang mahigit dalawang taon sa W100 Landsville Koser Jewelers Tennis Challenge na nagtapos sa 7-5, 6-2 pabor sa 21-anyos na Pinay lefty noong Agosto, 2024, kung saan nakalista lamang ito sa 147 place sa Women’s Tennis Association (WTA) rankings.

Sa muling pagtatapat, tangan ni Eala ang pagiging World No.18, habang ang 23-anyos na tubong Southbury, Connecticut ay nasa pinakamataas nitong tuntong sa World No. 122, na binitbit sa kauna-unahang NCAA Championship ang Texas A&M Aggies noong 2024 at ginawaran bilang Most Valuable Player.

Makalipas ang mahigit dalawang taong hindi pagtatagpo sa laro, unti-unting iniangat at trinabaho ng 5-foot-9 na tubong Quezon City ang kanyang karera patungo sa kasalukuyang posisyon sa pagiging two-time WTA 125 titlist at unang WTA 500 Mubadala DC Citi Open at dalawang seedings sa Grand Slam tournaments, habang kinilala namang SEC Player of the Year, ITA National Player of the Year, at Honda Sports Award, gayundin ang pagiging All-American sa singles at doubles si Stoiana. (Gerard Arce)