Ipinag-pray daw ng BF na si Ruru… BIANCA, 8 MONTHS BAGO NA-CONVERT NA IGLESIA NI CRISTO

ni Vinia Vivar @Frankly Speaking | March 10, 2023

Nilinaw ni Ruru Madrid ang maling impresyon na kaya nagpa-convert ng relihiyon ang girlfriend na si Bianca Umali ay dahil sa kanya.

Isang Iglesia ni Cristo (INC) si Ruru at noong 2021 ay nagpa-convert si Bianca sa nasabing religion. Kaya naman, people are thinking talaga na dahil sa pagmamahal niya sa boyfriend kaya sumapi siya sa relihiyon nito.

“Siguro, marami ring misconception ang mga tao na parang pakiramdam nila, ginawa ni Bianca ‘yung pag-convert sa INC just because of me.

“Pero siguro, naging instrumento po ako. Kasi siyempre, hindi ko naman siya tinutukan ng baril na ‘Mag-convert ka para sa akin,’ wala naman pong ganu’n,” sey ni Ruru nang makatsikahan namin sa mediacon ng Beautederm kung saan ay isa siya sa mga ambassadors.

“Siya po ‘yung nagsabi sa akin na open daw po siya para sa aral ng Iglesia ni Cristo,” patuloy ni Ruru.

Birthday daw ni Bianca noon nang sabihin nito sa kanya na gusto na nitong magpa-doktrina.

“Kaya sobrang na-touch ako,” sambit ni Ruru.

Mahirap daw ang dinaanan ng girlfriend para maging INC.

“Hindi naman ‘yan overnight lang, eh. It will take 8 months bago ka ma-convert. So, inaral niya po talaga ‘yun. So, I don’t think, just because of me kaya niya ginawa ‘yun,” sey ng Kapuso hunk.

Of course, bago naman daw ginawa ni Bianca ‘yun ay pareho silang nagsabi muna sa lola ng aktres.

“At first, natakot kami na baka hindi pumayag. Pero nagulat kami na sobrang open din ni Mama Vicky. So, sobrang na-touch ako. Ipinagpanata ko ‘yun. I mean, every night, ipinagpe-pray ko ‘yun na sana, maging open,” kuwento ni Ruru.