Ika-11 titulo target ng Cool Smashers sa Game 2

by Gerard Arce @Sports News | April 23, 2026

Photo: PVL

Mga laro ngayong Huwebes

(Smart Araneta Coliseum)

Battle-for-3rd (best-of-3) Game 2

3 pm – PLDT vs Farm Fresh

Finals: Game 2 (best-of-three)

5:30 pm – Creamline vs Cignal 

Isang panalo na lang para sa 11^th league title ang puntirya nina Jema Galanza at Bernadeth Pons para sa Creamline Cool Smashers na pagkakataong makamit ngayong gabi kontra Cignal Super Spikers sa Game 2 ng best-of-three finals, habang tangkang kunin ng PLDT High Speed Hitters ang ikatlong podium finish laban sa Farm Fresh Foxies sa pambungad na hatawan sa Premier Volleyball League All-Filipino Conference sa Smart Araneta Coliseum.

Nangwalis sa 3 sets ang Cool Smashers sa Game 1 noong Martes ng gabi sa pagbida ni Galanza na tumapos ng 17 puntos  habang tumikada ng double-double si Pons sa 11 marka.

“Siyempre, sobrang happy kasi in three sets namin nakuha 'yung Cignal. Malaking benefit kasi one-day preparation lang para sa Game 2,” pahayag ni Creamline head coach Sherwin Meneses.

“Makakapag-rest kami nang maayos, then makakapag-training din kasi hindi pa naman tapos yung laban. Tatrabahuhin namin 'yung mga lapses namin… pero hindi kami puwedeng magkampante. Ang Cignal, hindi bibitaw yan.”