Alas kinapos sa Kazakhs, swak sa classification

by Gerard Arce @Sports News | September 17, 2026

Photo: Ang Alas Pilipinas (Goforgold)

Hindi sapat ang game-high tambalan nina collegiate champions Angel Anne Canino at Alyssa Solomon para buhatin ang Alas Pilipinas women’s volleyball team tungo sa panalo na tatapusin ang kampanya sa paghahanap ng medalya sa 20th Aichi-Nagoya Asian Games matapos yumuko sa Kazakhstan sa iskor na 29-27, 24-26, 23-25, 19-25 para bumagsak sa 0-2 sa Pool B na ginanap sa Okazaki Chuo Sogo Park Gymnasium sa Nagoya, Japan.

Kumamada ang dating UAAP Rookie/MVP na si Canino ng kabuuang 23 puntos mula sa 20 atake dalawang blocks at isang ace, habang sumegunda ang dating Osaka Marvelous hitter na si Solomon sa 20 marka galing sa 15 kills, apat na kill blocks at isang ace na kinakitaan naman ng 29 kabuuang errors upang mabulilyaso ang pagpasok sa quarterfinals.

Kinakitaan agad ng mainit na simula ang pambato ng De La Salle University Lady Spikers sa opening set ng kumamada ito ng apat sa huling anim na puntos ng Alas upang makamit ang inaasam na 27-26 na bentahe, na sinundan ng pandiinang atake ni Eya Laure tungo sa unang panalong set ngayong edisyon, matapos walisin ng China nitong Miyerkules.

Naging matigas naman ang net defense ng Kazakhs pagdating ng second set sa pagtala ng 7 sa kabuuang 12 blocks na pinamunuan ni Tatyana Nikitina na may anim na kabuuang blocks, kumpara sa isa lamang ng Alas, na sumandal sa 18 atake, habang may apat na errors ang Pilipinas laban sa lima ng Kazakhs.

Mas naging epektibo na ang atake ng World 42 Kazakhstan sa sumunod na dalawang sets, na sinabayan ng matutulis na services sa kabuuang siyam kumpara sa tatlo lamang ng Alas Pilipinas, na mag-aabang sa ika-9th hanggang 14th na classification match sa Linggo, habang makakaharap ng Kazakhs ang World No.7 at defending champion China ngayong araw.

Nanguna sa iskoring para sa Kazakhstan si Nikitina sa 19 puntos mula sa 13 atake at anim blocks, na sinundan ni Zhanna Syroyeshkina sa 17 marka galing sa 14 kills at tatlong blocks, gayundin sina Polina Ufimtseva sa 14pts at Kristina Belova sa 12pts. Fourth-place finish ang pinakamataas na puwestong nakamit ng women’s national team sa Asian Games noong 1962 Jakarta Games at 1966 Bangkok meet, habang sa nagdaang 2019 Jakarta-Palembang ay tumapos sa classification round ang Alas sa eight-place exit sa 1-6 rekord, habang hindi nakapagkwalipika sa 2022 Hangzhou Asian Games.

Maraño, may bagong career kaya nagretiro, "salamat Tyang!"

by Gerard Arce @Sports News | September 17, 2026

Photo: Pormal nang nagretiro si volleyball star Aby Maraño sa paglalaro sa Premier Volleyball League upang bigyang pansin ang bago niyang karera sa isang kumpanya nang bumisita at magsalita sa TOPS Usapang Sports. (Gen Villota)

Emosyonal na namaalam sa Tabloids Organization in Philippine Sports (TOPS) si Phil professional volleyball star Aby Maraño na kilalang 'Tyang Aby' ng kanyang fans para sa kanyang opisyal nq pagreretiro bilang player ng Premier Volleyball League (PVL).

Sa pagbisita sa TOPS ngayong Huwebes ng dating La Salle player, inalala niya ang matinding pagsisikap niya noong kabataan sa paglalaro ng volleyball, noong 11-anyos siya mula sa paggawa ng net ay itinatali pa nila ito sa puno o kaya ay posteng pinagpatungan lang ng mga bato para tumibay.

"Tuwing may daraan pang tricycle ay itataas pa namin ang net para makadaan ang sasakyan, sobrang hirap ng panahon na iyon nu'ng bata ako, pero naroon ang pangarap ko e. Hindi ko rin naranasan noon ang maglakwatsa, puro ako aral at training."

Sa edad niyang 34 ngayon, isang malaking oportunidad ang dumating nang italaga siya sa isang managerial position ng kumpanyang F2 Logistics Cargo Movers na sakto naman sa plano niyang iretiro na ang paglalaro lalo na at matatapos na siya sa master's degree ng kanyang kurso sa ngayon na may kaugnayan sa logistics.

"Dito sa work ko ngayon gusto kong matutunan ang degree ng trabaho ko at ang total operation, it's a great experience." Ipinapayo rin niya sa mga kabataang atleta na, "Hindi lang dapat puro training at laro, kundi pagtuunan din ng pansin ang pag-aaral at edukasyon dahil di habang panahon malakas at maglalaro, kailangang may kursong matatapos upang magkaroon ng future sakaling dumating ang point na titigil na sa paglalaro."

Nabanggit din ni Maraño na wala siyang iniindang anumang injury o karamdaman para magretiro, "Talagang natutunan ko lang sa volleyball na maging disiplinado sa sarili, matulog nang maaga, kumain ng tama at healthy living lang talaga para makaiwas sa injury."

Magkahalong lungkot at saya ang kanyang anunsiyo na bigyan na rin ngayon ng prayoridad na magamit ang pinag-aralan sa kolehiyo at makapagtrabaho. Pinabulaanan naman ni Maraño na siya ay mag-aasawa na bagamat inamin niyang in a relationship siya at masaya ang buhay pag-ibig. "Gusto ko munang magpokus sa bago kong career."

Canino at Laure nakipagsabayan pero 'di umubra sa 'Great Wall'

by Gerard Arce @Sports News | September 16, 2026

Photo: Huwag na raw mabahala ang Gilas Men dahil silang Gilas women na raw ang bahala sa gold sa umpisa ng kanilang kampanya sa 20th Asian Games. (mix trend ph)

Nagawang pagtrabahuhin ng Alas Pilipinas women’s national team ang World No. 7 China sa unang dalawang sets, subalit madaling isinuko ang pandiinang third set para malasap ang straight-set na pagkatalo sa 18-25, 22-25, 8-25, Miyerkules sa unang laro ng koponan sa Pool B ng 20th Aichi-Nagoya sa Okazaki Chuo Sogo Park Gymnasium sa Nagoya, Japan.

Nakuhang makalamang nang maaga ng 3-1 sa first set, subalit tumugon naman agad ang defending champions ng 10-3 run para sa 6-11 na bentahe. Nabuhayan naman ang mga birada ng beteranong si Eya Laure upang makadikit sa 11-13, ngunit nanatiling nanindigan ang China na muling umukit ng panibagong mga atake para sa 5-1 blast tungo sa 12-18.

Sinubukang buhatin nina Angel Canino at Laure ang koponan, ngunit sadyang matindi ang pwersa ng nine-time Asian Games titlist para makuha ang unang set sa pamamagitan ng 19 puntos mula sa atake kasama ang dalawang blocks, gayundin ang apat na error ng Pilipinas.

Nakakuha naman ng magandang laban ang Alas squad sa second set, kahit na nagtatangkaran ang mga Chinese squad na mayroong anim na six-footers na manlalaro, naging dikit ang laro simula umpisa hanggang sa kalagitnaan sa 15-16 na bentahe lamang ng China.

Bagaman naiangat ng China ang bentahe sa 16-20, hindi sumuko si Canino na sinabayan ng magkasunod na errors ng China at matinding butata ni Thea Gagate upang maitabla ng Alas ang laro sa 20-20.

Nanguna para sa Pilipinas si Canino sa 14 puntos mula sa 13 atake at isang ace, na sinundan ni Laure sa 10 marka, galing lahat sa atake, at Solomon sa siyam mula sa walo at isang block, habang bumida sa Chinese squad si Tang Xin sa 19 puntos galing sa 16 atake, dalawang aces at isang block, gayundin sina Zhuang Yushan sa 17 puntos at Wang Aoqian sa 13 puntos.

Susubukan ng World No. 56 na Alas Pilipinas na makakuha ng panalo laban sa World No. 42 na Kazakhstan ngayong araw bandang alas-12:00 ng hapon, upang manatiling buhay ang tsansa na umusad sa susunod na round.

Fourth-place finish ang pinakamataas na puwestong nakamit ng women’s national team sa Asian Games noong 1962 Jakarta Games at 1966 Bangkok meet, habang sa nagdaang 2019 Jakarta-Palembang ay tumapos sa classification round ang Alas sa eight-place exit sa 1-6 rekord, habang hindi nakapagkwalipika sa 2022 Hangzhou Asian Games.