Ibinulgar ng orig sa huling gabi ng lamay… BUNSO NI RICKY SA IBANG BABAE, TANGGAP NI JACKIE LOU AT MGA ANAK

ni Nitz Miralles @Bida | May 8 2025

Photo: Jackie Lou Blanco - IG

Nasagot ang tanong ng marami kung sino ang mom ni Justine Davao, isa sa apat na anak ni Ricky Davao sa eulogy ni Jackie Lou Blanco para sa asawa sa final day ng wake ng actor-director. 

Ang alam nating lahat, 3 ang anak nina Ricky at Jackie. Nang mabanggit si Justine, nagtanungan na kung sino ang mom nito o siya ba ang bunso nina Jackie at Ricky?

Sa eulogy ni Jackie, ipinakilala ang 2 babae na minahal ni Ricky na sina Cheryl Singzon at Mayeth Malca Darroca. Doon nabanggit na may anak na dalaga si Cheryl kay Ricky at si Justine na nga ‘yun.

Nabisita namin ang socmed (social media) account ni Justine na may post siyang photos nila ng amang si Ricky. 

Sa isang post, sabi ni Justine na “Teddy” ang tawag sa ama, “I’ll always be your Teddygirl, Papa. I love you.”

Maganda ang relasyon ni Justine sa mga siblings and cousins niya dahil nabasa naming nagko-comment sa post niya si Ara Davao, ang eldest nina Ricky at Jackie Lou. Nag-comment din ang magkapatid na sina Jessica at Maxine Gutierrez, mga anak nina Ramon Christopher at Lotlot de Leon.

May isa pang photo na hawak ni Ken (the only boy nina Ricky at Jackie) ang urn ni Ricky at magkakasama sa photo sina Justine, Ken, Rikki Mae at Ara. Kasama rin nila si Jackie Lou.

---

ARAW-ARAW may ganap si Alden Richards at bibilib ka sa time management nito dahil lahat nagagawa at kung may event man, lahat ay napupuntahan. 

Tanong ng mga fans nito, natutulog pa raw ba ang aktor o kaya’y may time magpahinga at mag-relax?

Kagagaling lang ni Alden sa Davao for an event sa BDO kung saan isa siya sa mga ambassadors, pagbalik ng Manila, spotted siya na tumatakbo at kinabukasan, nag-cycling naman. 

Kapag kasama na sa schedule niya ang training sa swimming na kailangan para sa pagsali niya sa Tokyo Marathon sa March 1, 2026, dagdag na schedule na naman ito sa aktor.

Noong isang gabi, dumalo si Alden sa Cinema Exhibitors Association of the Philippines (CEAP) kung saan tinanggap niya ang award na Box Office King dahil sa box office success ng Hello, Love, Again (HLA) movie nila ni Kathryn Bernardo.

Kinabukasan (kahapon), lumipad naman pa-South Korea si Alden dahil naimbita ng Paramount Pictures to attend the premiere night ng Mission Impossible: The Final Reckoning (MITFR) na tampok si Tom Cruise. Tuwang-tuwa si Alden dahil fan siya ng franchise at ni Tom Cruise.

Pagbalik ni Alden, ang paghahanda sa fun run na Lights, Camera, Run (LCR) ang aasikasuhin. Sa May 11 na ang fun run na organized ng Mowelfund at Myriad Corporation ni Alden. Maraming celebrities ang makikitakbo at sasabayan sila ng mga fans na lalong magpapasaya.