Iba raw ang dating, Arjo… PARI, NABIGHANI KAY MAINE, NA-DISTRACT HABANG NAGKAKASAL

ni Beth Gelena - @Bulgary Files | June 3, 2022

'Kaaliw naman ang paring nag-officiate sa kasal ng kapatid ni Maine Mendoza na si Coleen.

Ikinasal kamakailan ang sister ni Maine sa Barasoain Church sa Bulacan. Ang Eat… Bulaga! host-actress ang Maid of Honor kapareha ang boyfriend niyang si Cong. Arjo Atayde.

May post ang pari sa kanyang social media account na ikinukuwento ang nangyari habang ikinakasal niya ang sister ni Maine.

Aniya, na-distract siya sa maid of honor na walang iba kundi ang Dabarkads host.

Si Reverend Father Joseph Fidel Roura ang kasalukuyang parish priest ng Quasi-Parish of Our Lady of La Salette sa San Jose del Monte, Bulacan.

Isa rin siyang kilalang social media influencer-vlogger dahil sa kanyang inspiring memes at “tagos sa pusong” gospels at homilies.

Kinilala siya bilang Male Social Media Influencer of the Year sa 2020 Catholic Social Media Awards.

Ani Fr. Roura sa kanyang post, “Napakarami ko nang ikinasal, pero ngayon lang ako na-distract sa maid of honor.

“Iba rin kasi talaga ang appeal ni Maine Mendoza,” post niya.

Pagtuloy ni Fr. Roura, “'Yung puwede namang 'di na tawagin ang best man at maid of honor dahil nasa harap ko na 'yung arrhae and rings pero tinawag ko pa rin, haha. Para-paraan lang 'yan (with smiling face emoji at peace sign)."

O, 'di ba? Pari man ay nabibighani rin sa mga kababaihan.

Ano naman kaya ang masasabi ni Maine na ang beauty niya ay nakaka-distract pala sa mga 'alagad ng Diyos'?