Hindi pagtanggap ng notices galing sa employer

ni Atty. Persida Rueda-Acosta - @Magtanong Kay Attorney | July 2, 2022

Dear Chief Acosta,

Ako ay call center agent sa BPO. Nararamdaman ko na pinag-iinitan ako ng aming HR, kaya nang binigyan nila ako ng Notice to Explain, tinanggihan ko ito. Sa kabila nito, kinausap ko ang aming HR tungkol sa nasabing kaso at ako ay nagpunta sa itinakdang araw ng pagdinig. Makalipas ang isang linggo, sa kabila ng aking naging paliwanag, ako ay binigyan naman ng kopya ng aking Notice of Termination. Ito ay hindi ko rin tinanggap sapagkat ako ay hindi sang-ayon at para ito ay hindi magamit ng aking kumpanya laban sa akin. Tama ba ang naging desisyon ko? - Jude

Dear Jude,

Ang sagot sa iyong katanungan ay sinagot ng Korte Suprema sa kaso ng Systems and Plan Integrator and Development Corp. vs. Michelle Ballesteros (G.R. No. 217119, April 25, 2022), kung saan sinabi na ang Twin-Notice Rule ay natutugunan kahit na ito ay hindi tanggapin ng empleyado. Ayon sa Korte Suprema, sa pamamagitan ni Honorable Associate Justice Ramon Paul L. Hernando:

“In this case, the Court agrees with the CA that two notices were validly served upon Ballesteros, despite the fact that she refused to receive the first notice "because she wanted to talk to Mr. Ronniel Cunanan.” The CA correctly found and held that:

[T]he notice to explain (February 21, 2011 memorandum) was validly served upon the [Ballesteros]. Kristine Castro, Personnel Officer of [the company], indicated on the said notice that the private respondent "refused to receive because she wanted to talk to Mr. Ronniel Cunanan." Castro also executed an Affidavit dated April 24, 2012 attesting that she personally served the February 21, 2011 memorandum to [Ballesteros] but the latter refused to receive it, but she xxx got a copy anyway. The handwritten notation and Castro's affidavit are substantial pieces of evidence proving that the notice to explain was validly served upon [Ballesteros].

Accordingly, the requirement of procedural due process, particularly, the two-notice rule, was observed. Hence, there is no basis to award nominal damage in the amount of P20,000. (Binigyang-diin)

Sang-ayon sa nasabing desisyon ang requirement ng batas na magkaroon ng dalawang Notice o Twin-Notice Rule ay natutugunan kahit ito ay hindi tanggapin ng empleyado. Ang hindi pagtanggap ng empleyado ng notice ng kumpanya ay hindi nangangahulugang hindi nasunod ang proseso na itinalaga ng batas tungkol sa Twin-Notice Rule.

Gayunman, hindi rin naman nangangahulugang kapag nasunod ang Twin-Notice Rule ay tama na agad ang pagtanggal sa trabaho. Titingnan pa rin kung mayroon ba talagang basehan sa batas ang pagtanggal sa trabaho. Alinsunod sa Articles 207, 298, o 299 ng ating Labor Code, ang pagtanggal sa trabaho ay magiging legal lamang kung ito ay base sa just or authorized cause.

Kaya naman, ang pagtanggi na tanggapin ang mga notices mula sa iyong employer ay hindi hadlang upang masunod ang Twin-Notice Rule. Gayunman, kung hindi sang-ayon sa desisyon ng iyong employer at sa tingin mo ay hindi ito tama, maaari pa ring silipin kung mayroon bang sapat na basehan ang pagtanggal sa iyo sa trabaho. Kung wala, maaaring mapanagot sa batas ang iyong employer.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.