Hindi maaaring ilipat sa ibang pangalan ang “chassis” at “engine number” ng sasakyan

ni Atty. Persida Rueda-Acosta - @Magtanong Kay Attorney | June 15, 2021

Dear Chief Acosta,

Ang aking sasakyan ay nasangkot sa aksidente kamakailan. Ang nasabing insidente ay nagdulot ng lubos na pagkasira ng aking sasakyan. Maaari ko pa rin bang ipalipat sa pangalan ng ibang tao ang chassis at engine number nito? – Roger

Dear Roger,

Para sa inyong kaalaman, ang inyong suliranin ay tinatalakay sa Republic Act (R. A.) No. 10883, o mas kilala bilang New Anti-Carnapping Act of 2016. Nabanggit sa Section 15 ng R. A. No. 10883 na:

“Section 15. Identity Transfer. – It shall be unlawful for any person, office or entity to cause and/or allow the sale, registration, and/or transfer into another name, the chassis number, engine number and plate number of a motor vehicle declared as “total wreck” or beyond economic repair by concerned insurance company, and/or law enforcement agencies, due to its involvement in a vehicular accident or for some other causes. The LTO shall cancel the registration of total wreck vehicle as reported by the PNP and/or as declared by the Insurance Commission.” (Binigyang-diin)

Ayon sa nabanggit na probisyon ng batas, hindi maaaring ibenta o ilipat sa ibang pangalan ang chassis, engine at plate number ng sasakyan kapag ito ay idineklarang “total wreck” o kapag hindi na ito maayos pa ayon sa insurance company o ahensiya ng gobyerno na nagpapatupad ng batas.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.