Habang tumatagal, mas lumalala pa ang sitwasyon, tsk!

ni Ka Ambo - @Bistado | April 24, 2021

Isa ang namatay habang nakapila sa community pantry.

Malungkot na eksena!

◘◘◘

PILA-BALDE ang nake-cremate na bangkay ng COVID patient sa India.

Kapos na ang supply ng panggatong na kahoy sa New Delhi!

◘◘◘

SA India, ginagawa ang bilyun-bilyong dosage ng COVID vaccine.

Hindi kaya nagkaroon ng leak sa mga laboratory?

Walang nagpapaliwanag!

◘◘◘

TULIRO na ang gobyerno at panic.

Hindi mapigil ang pagguho ng ekonomiya!

◘◘◘

MAY mga nagtatangkang magbukas ng negosyo upang maging self-employed, pero nagsasarado rin agad dahil walang customer at kliyente.

Lahat ng airlines ay nalulugi!

◘◘◘

NALULUGI rin ang mga 24/7 convenience store.

Lugi rin ang mga fast foods at karinderya.

Paano mareresolba ‘yan?

◘◘◘

KAHIT alisin ang lockdown, makakaahon ba sa pagkalugi ang nagsaradong negosyo sa isang araw lang?

Kapag “patay” ang negosyo, “patay” talaga ‘yan.

Walang “patay” na nabubuhay!

◘◘◘

ANG COVID ay matatalo o malulunasan ng bakuna.

Pero, paano mabubuhay ang nagsaradong negosyo?

◘◘◘

NAPAKARAMING walang trabaho ngayon.

Mas malala ang sitwasyon ngayon—kaysa last year—nang magsimula ang pandemic.

Ang epekto ng COVID—ay sa taong ito mararanasan!

◘◘◘

DATI-RATI ay mabibilang lamang sa daliri ang namamatay o naoospital.

Pero, ngayon—ang post sa social media ay palaging may “kandila” ang photo profile!

◘◘◘

HINDI lang ang COVID ang sanhi ng pagkamatay ng mga tao sa ating paligid.

Mas marami ang namamatay sa “stress” at “depression”!

◘◘◘

MARAMI ang hindi makatulog, marami ang hindi makakain.

Marami ang nanghihina at wala sa kondisyon.

Paano kaya ‘yan?