Gymnastics sa bansa, tututukan ang suporta

ni Gerard Arce - @Sports | October 28, 2021

Bilang paghahanda at preparasyon sa 2024 Paris Olympics, kabi-kabilang mga plano ang inilalatag at isinakatuparan ng Gymnastics Association of the Philippines (GAP) sa kanilang mga atleta, higit na kay 2-time World champion Caloy Yulo.

Inihahanda na ang isang state-of-the-art world class gymnastic gym na mula sa isang dating warehouse malapit sa Pamantasan ng Lungsod ng Maynila sa Intramuros.

Dumaraan na sa renobasyon ang naturang lugar na aabot ang gastusin sa P10 million na popondohan ng MVP Sports Foundation ni Manny Pangilinan, kabilang ang mga kagamitan galing sa Philippine Sports Commission (PSC) at iba pang mga sponsors.

Ibinalita rin ni GAP President Cynthia Carrion na magkakaroon rin ng isang gymnasium sa Calamba, Laguna na popondohan ng Japanese Embassy para sa mga developmental athletes. “We’re going to have a world class gym. We want the athletes the feeling that they’re worth it. I want to give them the best even their lounge, a place to play, a place to sleep, a restaurant, I’m going to give them the best so that they feel more motivated,” pahayag ni Carrion sa weekly PSA Forum. “It’s a gym for those developmental athletes who want to be Caloy. They will have a minimal equipment supported by Japanese Embassy because they can’t afford it.”

Tulad ng katangian na mayroon ang grupo ni 2020 Tokyo Olympics women’s weightlifting gold medalist Hidilyn Diaz na TeamHD, nais din ni Carrion na magkaroon din ng kumpletong suporta ang 21-anyos na men’s vault champion at parallel bars runner-up sa 2021 Kitakyushu World Championships ng karagdagang hahalili at gagabay sa kanyang emosyonal at kaisipang aspeto, matapos magkaroon na ng foreign coach, therapists at kaalaman sa tamang nutrisyon.

“We’re going to have a full team, a sports psychologist, but not nutritionist, because they know what to eat, we already have a therapist,” saad ni Carrion.