ni GA @Sports | October 04, 2023
Tatlong Filipino ang nakatakdang magpapakitang-gilas sa 2024 Paris Olympics matapos makakuha ng puwesto si Pinay gymnast Aleah Finnegan sa Artistic Gymnastics World Championships sa Antwerp, Belgium.
Ito ang magiging kauna-unahang pagkakataon na makakapaglaro ang isang Pinay gymnast sa Summer Olympic Games matapos ang mahabang panahon at nakatakdang samahan si Tokyo Olympian Carlos “Caloy” Yulo.
Makakatuntong ang 20-anyos na Filipino-American sa Olympics matapos mapagdesisyunang dalhin ang bandila ng Pilipinas kasunod ng mga pagsabak sa kompetisyon sa Estados Unidos, kung saan nagbulsa ito ng pilak na medalya sa team all-around sa 2019 Pan-American Games.
“I’ve been wanting to go to the Olympics since I knew what the Olympics were,” wika ni Finnegan na isa sa mga pinapangarap nito sapol pa noong kabataan, na nabigong gawin ng kanyang nakatatandang kapatid na si Sarah para sa US national team. “I was kind of calculating how old I would need to be and what years that would be. I never really thought growing up that it would be 2024, but here I am with this opportunity.”
Ipinanganak at lumaking Filipino ang kanyang ina na si Linabelle, habang ang kanyang nakatatandang ate na si Hannah ay minsang kinatawan ang Pilipinas sa Southeast Asian Games.
Rumehistro si Finnegan ng 51.366 puntos mula sa apat na apparatus bilang ika-14th highest ranked na gymnasts sa women’s all-around. Nakakuha ito ng 13.400 sa vault, 12.433 sa bars, 12.700 sa balance beam, at 12.833 sa floor exercise upang tumapos sa ika-32nd sa kabuuang 117 competitors.
Bukod kay Yulo ay makakasama nito si World No.2 at 19th Asian Games men’s pole vault champion Ernest John Obien ana naging unang Filipino na nagkuwalipika sa Paris Olympics.