Guest sa concert ng Sexbomb, ‘di raw tinilian… BINI, YUMABANG AGAD, 1 TAON PA LANG, LAOS NA

ni Beth Gelena @Bulgary | February 10, 2026

Photo: BINI PH

Todo-gawa ang ilang fans ng isyu para sa P-pop girl group na BINI nang mag-guest sila sa dance concert ng Sexbomb noong Sabado, February 6, sa SM Mall of Asia (MOA) Arena. 

Marami ang nagsasabi na noong lumabas sa stage ang BINI, walang masyadong nagtilian.

Kaya ayon sa aming nakatsikahan, “Nag-guest lang ang BINI kagabi sa concert ng Sexbomb. Wala, eh, pa-guest-guest na lang sila. Lumaki kasi agad ang mga ulo, eh. Yumabang pa. 

“Sa last concert nga nila, namigay na ng tiket pero ‘di pa rin napuno ang venue. Ngayon, nakiki-ride na lang sila sa kung saan may mga malalakas na nagko-concert para mapag-usapan muli.”

Aniya pa, “Nakakainis lang kasi inuna (BINI) ang yabang sa sarili kaysa lalo nilang pinagbuti ang career. ‘Di naman lahat ng oras ay sikat sila. Madaling sumikat, madali ring lumubog. “Nakakapanghinayang din naman, one year pa lang sumisikat, mukhang ‘di na masusundan pa. Hindi sila gaanong tinilian unlike sa Sexbomb. Lumipas na agad ang kasikatan nila.”

Ganern?

---

Nang magkatabi sa stage…

GLAIZA, NAGSALITA NA KUNG BAKIT TODO-TITIG ANG MISTER KAY MARIS

NAGSALITA na ang Kapuso actress na si Glaiza de Castro kaugnay ng mga usap-usapan online tungkol sa pagtitig ng kanyang mister na si David Rainey sa katabi nitong aktres na si Maris Racal sa isang event.

Nag-ugat ang isyu sa isang viral clip na kuha noong premiere night ng pelikulang Unmarry last year. 

Um-attend ang mag-asawa sa premiere para suportahan ang kaibigang si Angelica Panganiban, ang lead actress ng pelikula.

Maraming netizens ang nakapansin na titig na titig ang mister ni Glaiza kay Maris habang nagsasalita ito sa stage. Kumalat ang video clip sa social media at ginawan ng isyu.

Ipinaliwanag ng Kapuso actress na naaasiwa lang ang kanyang asawa habang nasa entablado dahil hindi naman daw showbiz si David. 

Inihayag niya na ang unang reaksiyon ni David sa trending clip ay gulat na “Blood hell” dahil hindi nga ito sanay sa atensiyon ng publiko at nagulat nang mag-trending siya.

Ayon sa aktres sa Fast Talk with Boy Abunda (FTWBA), ipinakita niya ang trending video kay David para makita ang reaksiyon nito.

“Sabi ko, ‘Trending ka.’ Sabi n’ya, ‘What?!’ Actually, ‘di po talaga s’ya sanay sa public,” natatawang sey ni Glaiza.

Pag-amin niya, awkward dahil magkahawak sila ng kamay habang papunta sa stage. 

Dahil mabilis ang event, nagdesisyon siyang isama si David. Nang tawagin sina Maris at Kean Cipriano sa stage, nahirapan si David kung saan titingin. 

“So s’yempre, ang tendency ni David, parang, ‘Ano’ng gagawin ko rito?’ ‘Di naman din po s’ya kinakausap… So, nu’ng time na nagsasalita si Maris, of course, tumitingin s’ya kay Maris. So ‘yun ‘yung explanation,” dagdag ni Glaiza.

Aminado siyang naba-bother siya sa mga negative comments tulad ng “David has a tendency to cheat” kaya kumonsulta siya agad sa pamilya at ang payo nila, dedmahin na lang ang mga trolls.