Gilas, problemado sa injuries at kulang pa sa manlalaro

ni Gerard Arce - @Sports | October 25, 2022

Hilong-talilong ang Gilas Pilipinas sa paghahanda nito sa darating na fourth window ng FIBA basketball World Cup Asian Qualifiers sa susunod na buwan dahil sa sandamakmak na kinakaharap na problema sa injuries ng mga manlalaro nito.

Inamin ni head coach Chot Reyes na tila nawawalang saysay ng kanilang pagsasanay dahil sa kakulangan ng mga pangunahing manlalaro higit na ang point guard na posisyon na hinahawakan ni Chris Newsome ng Meralco Bolts at Scottie Thompson ng Brgy. Ginebra San Miguel. Gayundin ang kawalan ng matatag na sentro mula kina six-time PBA MVP June Mar Fajardo ng San Miguel Beer, na dumaan sa operasyon sa lalamunan at Filipino-naturalized Ange Kouame ng Ateneo de Manila University Blue Eagles.

Sinisipat mabuti ng 59-anyos na six-time PBA coach of the year awardee ang kabuuan ng kanilang line up laban sa Jordan sa Nob. 10 (Nov 11) at Saudi Arabia sa Nob. 13 (Nov.14) kasunod ng isinagawang ensayo nitong Lunes, na ginaganap isang beses kada linggo.

Patuloy na nagpapagaling si Newsome sa kanyang calf injury, habang bugbog sarado ang tuhod ni Thompson sa magkasunod na laro kontra Phoenix at Magnolia, samantalang nagpapagaling si Fajardo sa kanyang operasyon at nanood lamang si Kouame sa kanilang ensayo dahil sa iniinda ring injury.

“We practiced without a point guard in our last practice. Our biggest problem really is just getting enough healthy bodies in practice. Those are the challenges that we are facing right now,” wika ni Reyes sa isang lumabas na report. “The question is are they going to be healthy and ready enough and we won’t know that until we get closer to the window itself.”