Galanza, bida sa bronze finish Cool Smashers, Gazz champ uli

ni Gerard Arce - @Sports | December 7, 2022

Inihataw ng husto ni Jessica Margaret “Jema” Galanza ang pandiinang palo upang dalhin ang Creamline Cool Smashers sa kanilang ikatlong third place finish matapos maunsyami ang inaasam na three-peat para patirikin ang Chery Tiggo Crossovers sa bisa ng 25-15, 25-19, 23-25, 25-21, kahapon sa huling kumperensya ngayong taon ng 2022 Premier Volleyball League (PVL) Reinforced Conference sa Philsports Arena sa Pasig City.

Hindi pinayagan ng 26-anyos na one-time conference MVP na mapahaba ang laro patungo sa ikalimang set ng Chery Tiggo ng ibaon nito matinding hambalos mula sa ikatlong pagsubok matapos matakasan ang dalawang tangka nito sa bigay ni playmaker Jia Morado-De Guzman.

Tumapos ang dating Adamson Lady Falcons heavy-hitter ng kabuuang 16 puntos mula sa 15 atake kasama ang 12 digs, habang nanguna sa hatawan si back-to-back conference MVP Diana Mae “Tots” Carlos sa 19 puntos mula sa 17 atake at dalawang aces. “Well we knew anyone can step up for our team can be the role naman, we really one to finish the series strong, we have a great year, what a way to end it with a win,” pahayag ni Morado na tumapos ng kabuuang 26 excellent sets, kasama ang apat na puntos upang tapusin ang taon na kabilang pa rin sa podium finish kasunod na dalawang titulo sa Open at Invitational Conference.

Samantala, ginapi ng Petro Gazz ang Cignal HD Spikers sa four sets, 25-17, 22-25, 25-12, 25-22 sa Game Two ng Finals upang masungkit ang ikalawang sunod na Reinforced Conference title sa Premier Volleyball League. Nakuha ng Angels pahirapang 25-21, 27-25, 37-35 straight sets win sa Game One. Tinapos ng Petro Gazz ang elimination round sa third place hawak ang 5-3 win-loss card bago pumoste ng 2-1 standing sa round robin semis.