Fencer Catantan, naka-3 gold sa women's foil sa U.S.

ni Gerard Arce - @Sports | November 10, 2022

Nagreyna ang nangungunang Filipina fencer na si Samantha Catantan upang mahagip sa Penn State Nittany Lions ang tatlong gintong medalya sa katatapos na women’s division 1 Garrett Open women’s foil finals sa Pennsylvania sa U.S.

Nasungkit ng 20-anyos na dating juniors UAAP MVP ang kampeonato laban sa kakamping si Arianna Proietti sa iskor na 15-9 na nilahukan ng 16 na manlalaro na sumabak sa 3 rounds ng pool play.

Naunang tinalo ng 2021 SEAG gold medalist si Annie Lin ng Yale University, 15-8, at Renee Oymann ng Temple sa 15-7, habang naging dikdikan ang tapatan nila ni Emme Zhou ng Yale sa iskor na 15-13 sa semifinals.

“Overall, I am very thankful with the way I fenced and that I’m able to do fencing actions I’ve been practicing on,” ayon sa inilabas na statement ni Catantan na nagawang makatulong kina Kateryna Chorniy na nagwagi ng gold kasama si Jaclyn Khrol para sa women’s epee, gayundin ang teammate nilang si Ola Strzalkowski sa women’s sabre.

“I’d say it’s a good sign to start the season. I was able to figure out things I need to improve and focus on,” dagdag ni Catantan na nakuha ang nag-iisang ginto ng Pilipinas sa biennial meet sa Hanoi, Vietnam.

Naging kauna-unahang Filipina fencer si Catantan na nakakuha ng athletic scholarship sa U.S. at makapaglaro sa NCAA matapos maging pangunahing manlalaro ni dating national team coach Ronald Canlas.