ni VA - @Sports | November 7, 2020
Nagtala ng panibagong rekord sa kasaysayan ng Philippine volleyball si Marck Espejo bilang unang Filipino volleyball player na nakapaglaro sa tatlong magkakaibang bansa. Umalis ang 5-time UAAP MVP patungong Bahrain noong Huwebes ng hapon para maglaro sa koponan ng Bani Jamra sa Bahrain League.
Magsisilbing import ang 23-anyos na si Espejo para sa Bani Jamra hanggang Enero 30. "Itong league siguro sobrang mag-boost ng career ko ito if mag-boom ako doon. Kasi gulf area magandang exposure yon para sa akin," pahayag ni Espejo sa panayam sa kanya ng SPIN.ph. Nakatakdang magsimula ang Bahrain first Division League na may 8-team field na kinabibilangan din ng Al Muharraq, Al Ahly, Al Najma, Dar Kulaib, Al Nasr, Al Busaiteen at A’ali bukas-Linggo. Ito na ang pangatlong overseas stint ni Espejo matapos nyang maglaro sa Japan V.League bilang import ng Oita Miyoshi at sa Visakha Volleyball Club sa Thailand League na pinaikli ng COVID-19 pandemic.
Ang huling pagkakataon na naglaro si Espejo dito sa bansa ay noong nakaraang taon kung saan pinamunuan nya ang Philippine men's volleyball team na nagwagi ng makasaysayang silver medal sa 30th Southeast Asian Games.