Eala pinasuko si Gauff, swak na sa round-of-16

ni Gerard Arce @Sports News | March 10, 2026

Photo: Coco Gauff at Alex Eala / YT Circulated

Usad sa panibagong round si Filipina tennis ace Alexandra “Alex” Eala matapos sumuko sa 2nd set ang katapat na si World No.4 Coco Gauff dulot ng injury sa kanilang rematch kahapon ng umaga sa tinaguriang “Fifth Grand Slam” na BNP Paribas Open sa Indian Wells Tennis Garden sa California. 

Angat si Eala sa iskor sa 6-2, 2-0 nang tumigil ang 21-anyos na 2-time Grand Slam champion dahil sa injury ng nakabalot na kaliwang braso, kung saan ika-2 beses ng umayaw ang American tennis player dahil pa rin sa injury.

“I’m sorry, I hate to do this,” wika ni Gauff kay Eala, matapos ang mainit na palitan sa second set, na sinundan ng mainit na pagbati sa gitna ng court. “Thank you, Coco, for being an amazing competitor and an amazing role model – I really hope that everything is well and you will recover soon," pahayag ni Eala sa on-court interview. “I really didn’t want to win this way, but this is still a really big moment for me to be able to play on Stadium 1 at Indian Wells against such a great competitor. I’m really grateful to be here and I’m super happy.” 

Matatandaang pinataob ni Gauff si Eala sa nagdaang Dubai Tennis Championships na nagtapos sa  0-6, 2-6 noong Pebrero sa Dubai. Nananatiling kahanay din ni Eala sina Talia Gibson ng Great Britain, na dalawang beses ng tinatalo ni Eala sa International Tennis Circuit sa 19A Spain at Great Britain 12A noong 2023, na katapat sa 3rd round si World No. 7 Jasmine Paolini ng Italy, na tinalo ni Eala sa round-of-32 sa Dubai Open. Makakatapat ni Eala ang mananalo sa quarterfinals sakaling makaligtas itong muli kay Linda Noskova.

Kasama pa rin ni Eala sa upper half ng draw sina World no.1 Aryna Sabalenka, na kalaban si dating 4-time Grand Slam titlist Naomi Osaka ng Japan, habang magtatapat sina World No.6 Amanda Anisimov at World No.10 Victoria Mboko ng Canada.