Eala hindi na ka-doubles si Williams sa Mubadala DC

by Gerard Arce @Sports News | July 27, 2026

Photo: Alex Eala at Shenqinwen - IG

Mabigat na tungkulin agad ang kakaharaping pagsubok ni Filipina tennis star Alexandra “Alex” Eala sa pakikipagtapat kay 2024 Paris Olympics gold medalist Zhen Qinweng ng China sa first round ng Women’s Tennis Association (WTA) 500 Mubadala Citi DC Open ngayong araw sa William H.G. FitzGerald Tennis Center sa Washington, DC. 

Ito ang pagsisimula ng North American hard-court swing para sa 21-anyos na lefty na bitbit ang momentum mula sa 4th-round exit sa prestihiyosong Wimbledon  Open. 

Malayo man ang agwat pagdating sa WTA rankings ng dalawa, kung saan nasa No. 123 ang Paris Olympian champion, hindi naman matatawaran ang karanasan ng 5-foot-10 Barcelona, Spain-based Chinese player na minsang nakuha ang World No.4 noong Hunyo, 2025.

Gayunman, asahan na umanong daragsa rin ang mga Filipino at dayuhang  tagahanga ni Eala sa Washington, D.C. upang mapanood ang laro ng two-time WTA 125 titlist. 

Samantala, matapos ipakita ang ginawang pagsasanay nina Eala at tennis legend at 14-time Grand Slam doubles champion Venus Williams sa social media, bilang preparasyon sa inaabangang ikalawang tandem sa tennis court, walang paliwanag na pinalitan ang kapares ng American tennis champion.

Makakasama ng 46-anyos na dating multiple Grand Slam at Olympic champion ang World No. 18 at kababayang si Diana Shnaider, na makakaharap ang tambalan nina Ulrikke Eikeri ng Norway at Quinn Gleason ng US sa round of 16 ng women’s doubles.

Nakatakda ring sumabak si Williams kontra World No. 28 Anastasia Potapova ng Austria sa first round, habang sakaling magtagumpay rito ay makakaharap ang katandem na si Shnaider sa 2nd round, na may hawak na Bye bilang 4th seed.