Eala balik sa WTA Top 30, abangan sa Bad Homburg

by Gerard Arce @Sports News | June 23, 2026

Photo: Kasagupa kagabi ni Alex Eala si Elise Mertens sa unang round ng 2026 Bad Homburg Open habang si Venus Williams na nasa larawan ang magiging kakampi niya sa doubles. 

Balik sa pagiging Top 30 sa world rankings si 2X Women’s Tennis Association (WTA) 125 champion Alexandra “Alex” Eala, habang eentra ito sa prestihiyosong 2026 Wimbledon Open bilang 29^th seed na magsisimula Hunyo 29 hanggang Hulyo 12 sa All England Lawn Tennis and Croquet Club (AELTC) sa Wimbledon, London, England.

Naging malaking angat sa 21-anyos na Pinay lefty ang tagumpay sa WTA 125 Birmingham Classic para sa ikalawang singles title at ang semifinal finish sa katatapos lang na Vanda Pharmaceuticals Berlin Tennis Open, kung saan tinalo niya sina 2024 Paris Olympic silver medalist Donna Vekic ng Croatia sa round of 32; World No.2 Elena Rybakina ng Kazakhstan sa round of 16 at World No.8 Elina Svitolina ng Ukraine sa quarterfinals.

Yumuko lang ito sa kasalukuyang World No. 10 Linda Noskova ng Czech Republic na tinalo si World No.4 Jessica Pegula ng U.S. sa 6-4, 4-6, 6-3 sa finals, habang tuloy ang laban ni Eala sa Bad Homburg Open na makakatapat si Elise Mertens ng Belgium sa first round, habang makakatambal sa women's double si tennis great Venus Williams laban kina Catherine Harrison ng US at Alexandra Osborne ng Australia.

Umaasa si Eala na malalampasan ang World No. 26 mula Germany na si Mertens sa Bad Homburg Open, maaaring sunod na makatapat si dating World No.1 at ranked 15 sa mundo na si Naomi Osaka ng Japan na katapat si World 43 Magdalena Frech ng Poland sa 2nd round.

Inaasahang ipagtatanggol ni World No. 3 Iga Swiatek ng Poland ang kanyang korona sa Wimbledon Open, laban sa mga bigating sina Aryna Sabalenka ng Russia at Elena Rybakina, na kapwa magbabawi matapos malaglag sa Berlin Open, gayundin sina Coco Gauff ng US, Elina Svitolina at Marta Kostyuk ng Ukraine.