Donovan, inagaw ng Cavs sa Jazz; Karatedo, sasabak sa Int'l Tilt

ni MC - @Sports | September 4, 2022

Kinuha ng Cleveland Cavaliers si guard Donovan Mitchell mula sa Utah Jazz kapalit ng tatlong manlalaro at tatlong first-round draft pick.

Ipinalit sina guard Collin Sexton, forward Lauri Markkanen at rookie guard Ochai Agbaji na maglalaro na ngayon sa Jazz para sa 2022-23 season.

Bukod sa tatlong manlalaro, makakatanggap din ang Utah ng tatlong unprotected first-round draft choices at dalawang pick swaps.

Ang pag-trade kay Mitchell, isang three-time All-Star, ay nangangahulugan ng isang full-on rebuilding project para sa Jazz dahil hindi nila naabot ang Western Conference finals nitong mga nakaraang season kasama sina Mitchell at star center Rudy Gobert sa roster. Ipinagpalit ng Jazz si Gobert sa Minnesota Timberwolves sa offseason.

Samantala, todo ang ginagawang paghahanda ng Philippine Karatedo League (PKL) para sa lalahukan nitong mga international competitions.

Kabilang sa mga torneo na kanilang sasalihan ang Asia Cup E-Kata Championships sa darating na Oktubre sa England, ang World Chito Ryu Championship sa Indonesia, at ang 2023 World Goju ryu Karate Championship sa Italy.

Ayon kay PKL Founder na si Shihan Denisu Aquino, marami silang ginawang adjustment para sa mga torneo na kanilang sasalihan. Ibinida rin nito na maraming mga kabataan na ang nahihilig sa sport na Karatedo sa panahon ng pandemya.