Dikdikan na ang labanan sa PBA semis best-of-7

ni Gerard Arce - @Sports | October 03, 2021

Inaasahang magiging dikdikan ang labanan sa pagitan ng San Miguel Corporation at MVP Group sa magkahiwalay na tagpo ngayong Linggo ng hapon sa pagsisimula ng best-of-seven semifinal round ng 46th PBA Philippine Cup sa Don Honorio Ventura State University sa Bacolor, Pampanga.

Tiyak na masusubukan ang dibdibang depensahan at kaldagan sa paghaharap ng (No.3) Magnolia Ang Pambansang Manok at (No.2) Meralco Bolts sa 2 P.M. at mga bigatin at powerhouse teams na 5-time Philippine Cup titlist San Miguel Beermen (No.4) at top-seed at league leading TNT Tropang Giga sa main game sa ng 4:35 p.m.

Bago makapasok sa semis round, dumaan muna sa isang do-or-die game ang Bolts kontra sa NLEX Road Warriors na matagumpay naman nilang dinispatsa, 97-86. Ngunit aminado ang Bolts na magiging matindi ang kompetisyon laban sa Hotshots na pinauwi sa dalawang laro ang Northport Batang Pier.

“It’s gonna be a tough game against them,” wika ni Bolts head coach Norman Black na nasubukan ang tibay ng koponan kontra Road Warriors. “We've had some great competition with Magnolia over the years. We've lost our share, we've won our share and most of the games have been competitive so I'm expecting the same thing,” dagdag ng Grand Slam coach at 5-time UAAP champion mula Ateneo.

Aminado naman ang Tropang Giga na hindi magiging madali para sa kanila na talunin ang Beermen na susubukang pigilan ang 6-time PBA MVP na si Junemar Fajardo at malalim na fire power nito na kinabibilangan nina Marcio Lassiter, Terrence Romeo, CJ Perez, Moa Tautuaa, Arwind Santos, Alex Cabagnot at Chris Ross.

Gayunpaman, nakahanda namang umariba pagdating sa opensa sina top best rookie candidate at 2nd Best Player of the Conference runner-up contender Mikey Williams, RR Pogoy, Troy Rosario, Brian Huruela, Kib Montalbo, Glen Khobuntin, Jay Alejandro 2008 MVP Kelly Williams, Poy Erram, Dave Marcelo at Asia’s best point guard Jayson Castro.