'Di totoong break na… NADINE AT BF, MAGKASAMA PA RIN SA FRANCE

ni Nitz Miralles - @Bida | September 14, 2022

Hindi break sina Nadine Lustre at Christophe Bariou at based ito sa photo nilang dalawa na in-upload ni Nadine sa kanyang Instagram. Kuha ang larawan sa trip nila sa France at kung break na ang dalawa, hindi magpo-post ng photo si Nadine kasama ang boyfriend.

Nasa bansa na yata sina Nadine at Christophe dahil may nabasa kaming sisimulan na nila ang shooting ng Viva Films movie niyang Deleter sa direction ni Mikhail Red.

Anyway, sa photo nila ni Christophe, marami ang masaya para kay Nadine dahil nasa tamang tao na raw siya. May nag-comment pa na “Nadine deserves all the happiness in this world.”

In fairness, walang JaDine fans na nag-comment, walang kumontra. Tanggap na siguro ng JaDine fans na may kani-kanyang buhay na sina Nadine at James Reid.