'Di kay David… IBINUKING NI BARBIE: JAK, KAY DENNIS SELOS NA SELOS

ni Janiz Navida @Showbiz Special | January 28, 2023

Ang lakas talaga ngayon ng tambalang FiLay (Fidel at Klay) nina David Licauco at Barbie Forteza sa GMA-7 teleseryeng Maria Clara at Ibarra.

Imagine, among all the love teams ngayon, sila ang napansin at napili ng mag-asawang negosyante na sina Mario Miguel at Shirleen Bautista para mag-endorso ng kanilang Ishin Skin products na bukod sa Advance White whitening supplement na pang-masa at affordable ang presyo, meron na ring Ishin Premium Soap, Ishin Premium Scrub, and Ishin Premium Lotion.

Sa ginanap na launching nina David at Barbie sa Le Reve para ipakilala silang endorsers ng Ishin Skin, nalaman naming 1 year pero renewable ang kanilang kontrata. Kaya ibig sabihin, kahit magtapos na ang Maria Clara at Ibarra, posible pa ring makitang magkasama ang FiLay sa mga promo events ng Ishin Skin.

Kaya nga naitanong namin kay Barbie kung paano niya ina-assure ang kanyang BF na si Jak Roberto na hindi magselos kay David kahit madalas ang kanilang pagsasama.

Sagot ni Barbie, napakalaki ng tiwala sa kanya ni Jak at thankful siya na artista rin ito kaya naiintindihan ang love team nila ni David.

At si David, alam naman daw niya ang kanyang boundaries at hindi niya "nilalandi" si Barbie dahil alam nga niyang may BF ito at may respeto siya kay Jak bilang kaibigan at kasamahan din niya ito sa Kapuso Network.

Pero pag-amin ni Barbie, hindi si David ang pinagseselosan ni Jak kundi ang alam ng boyfriend niya na crush na crush niyang si Dennis Trillo na mister ni Jennylyn Mercado.

Although pa-cute lang naman daw ang pagseselos ni Jak na tine-text siya kapag naka-locked-in taping sila ng Maria Clara at Ibarra at kinukumusta sila ni Dennis.

Hanggang sa ganu'n lang naman daw ang selosan nila at alam nila sa sarili nilang loyal sila sa isa't isa kaya tumagal na nang ilang taon ang kanilang relasyon.

Going back to their first and newest endorsement as love team, masaya sina Barbie at David na sila ang napili ng Ishin Skin dahil ibig sabihin lang, nagklik talaga ang kanilang FiLay love team at marami silang napapakilig.

Bagay na bagay naman silang endorsers ng Ishin Skin dahil pareho silang maputi at flawless ang skin, maalaga sa katawan at mukhang laging fresh at mabango.