De Los Santos, naka-32nd gold sa Okinawa E-Tourney #5

ni Gerard Arce - @Sports | September 12, 2021

Sinuntok ni dating two-time Southeast Asian Games medalist Orencio James Delos Santos ang kanyang ika-32nd gold medal ngayong taon sa katatapos lang na Okinawa e-Tournament World Series #5.

Lumapit na sa kanyang kabuuang 36 gold medals na nakuha noong isang taon ang 31-anyos na dating national team member matapos patumbahin sa elimination pool sina Marcus Madrusan ng Sweden at Jonathan Giron ng Mexico na parehong may 22.4 at Alfredo Bustamante ng U.S. sa 24.86, habang rumehistro ito ng pool best na 25.12 para harapin si Abdellatif Choukri ng Morocco sa finals matapos talunin sina Scott Taylor ng Canada at Domont Matias Moreno ng Switzerland.

Sa championship round ay pinadapa ng International Shotokan Karate Federation of the Philippines karateka na si Delos Santos ang pambato ng Essadaka De Sport Fes na si Choukri sa iskor na 25.14-24.06. “Just a few more to go! Keep moving forward,” wika ni De Los Santos sa kanyang Facebook account post.

Target ng Dela Salle University graduate na malampasan ang nakamit na 36 gold medals noong isang taon, kasunod ng pagkakakopo ng pagiging World No.1 sa e-kata male individual category.

Ito na rin ang ika-68th gold medals ng 8-time Philippine National Games champion buhat ng lumahok ito noong isang taon sa e-kata tournaments kasunod ng pagbabawal sa face-to-face events dahil sa pagkansela dulot ng coronavirus disease (Covid-19) pandemic.