Crossovers coach, balik aksyon sa PVL All-Filipino

ni Gerard Arce @Sports | January 25, 2023

Mayroong panibagong aasahang gagabay sa mga bagong saltang sina Ponggay Gaston, Seth Rodriguez at Bingle Landicho para sa Chery Tiggo Crossovers matapos pabalikin si coach Aaron Velez sa 2023 season ng Premier Volleyball League (PVL) All-Filipino Conference simula Peb. 4.

Inanunsiyo ng pamunuan ng Chery Tiggo ang pagbabalik posisyon ni Velez nitong Lunes ng gabi upang palitan si Coach Clarence Esteban na humawak sa koponan sa buong 2022 season na tatayong team manager, na naghahanda namang head coach ng Mapua Lady Cardinals at UST boys’ volleyball squad at assistant coach ng Golden Tigresses.

“The experienced coach is returning to take the wheel and lead the Chery Tiggo Crossovers back to the top,” pahayag ng volleyball club sa kanilang social media accounts.

Binitbit ni Velez ang koponan sa kanilang kauna-unahang korona sa 2021 PVL Open Conference sa bubble tournament na ginanap sa PCV Socio-Civic and Cultural Center sa Bacarra, Ilocos Norte, kung saan naglaro ang mag-utol na Dindin Santiago-Manabat at Jaja Santiago kontra Creamline Cool Smashers.

Nabigong idepensa ng Crossovers ang kanilang titulo noong nagdaang komperensiya matapos lumagapak sa ika-8 sa siyam na pwesto. Nangulelat din ito sa 8th place sa Invitational Conference at kinapos sa battle-for-third place sa Reinforced kontra Cool Smashers para sa 4th.

Nauna ng nagkaroon ng pagbabago sa koponan nang lumipat si Santiago-Manabat sa Akari Chargers, habang pumirma ng kontrata si Gaston galing ng Choco Mucho Flying Titans upang subukang punan ang nawalang puwesto ng 6-foot-2 power hitter.