ni Madel Moratillo | May 5, 2023
Iginiit ng Department of Health (DOH) na hindi dapat mag-panic ang publiko sa kabila ng tumataas na bilang ng mga nagpopositibo sa COVID-19.
"We don't need to panic. Ang tinitignan na natin kasi po ngayon 'yung healthcare system capacity, if it's manageable then we are good," ani DOH officer-in-charge Maria Rosario Vergeire.
Ayon pa kay Vergeire, nag-a-average sa 822 kaso kada araw ang mga kaso ng COVID, 79 porsyento na mas mataas sa nakalipas na 2 linggo. Karamihan umano rito'y mild at asymptomatic, at wala ring masyadong naoospital.
Inabisuhan na umano ang mga ospital na ihanda ang COVID beds sakaling tumaas pa ang mga kaso.
Ipinaliwanag pa ni Vergeire na posibleng tumataas ang mga kaso dahil sa mga variant ng COVID-19, "mobility" ng populasyon, at vulnerability ng indibidwal.
Sa ngayon, wala pang plano ang DOH na ibalik ang mandatory na pagsusuot ng face mask.