Community pantry, ‘di makatarungan na hingan pa ng permit

ni Pablo Hernandez III - @Prangkahan | April 22, 2021

MAY PERMIT ANG MGA NAMIMIGAY NG PAGKAIN, ‘YUNG NAMIMIGAY NG KALENDARYONG “RUN SARA RUN”, OKS LANG KAHIT WALA—Sinabihan ni DILG Usec. Martin Diño ang mga organizers ng “community pantry” na bago mamigay ng pagkain sa mga naghihikahos na mamamayan ay dapat kumuha muna ng permit sa mga LGUs o sa barangay hall.

Aba, teka, itong si Diño ay suwelduhan ng taumbayan, pero sa tema ng salita niya ay parang sa pamilya Duterte lang ito naglilingkod.

Imagine, nang mamigay ang mga DDS ng mga kalendaryo na may nakasaad na “Run Sara Run” ay hindi sila sinabihan na kumuha ng permit, pero ang “community pantry”, dapat may permit, boom!

◘◘◘

IMBES NA PASALAMATAN, TINATAKOT PA NINA BADOY AT PARLADE ANG MGA ORGANIZERS NG COMMUNITY PANTRY—Ilan sa mga organizers ng community pantry ang nire-red-tagged nina PCOO (Presidential Communications Operations Office) Usec. Lorraine Badoy at SolCom (Southern Luzon Command) chief, Gen. Antonio Parlade.

Hay naku, imbes na pasalamatan nina Badoy at Parlade ang mga organizers ng community pantry, eh, tinatakot pa! Gustong palabasin na ang komunista at terorista, ang mga namimigay ng pagkain sa mga naghihikahos na mamamayan, tsk-tsk-tsk!

◘◘◘

MAS MAY KATURURAN ANG SINABI NI SEN. BONG GO KAYSA KINA DINO, BADOY AT PARLADE—Ayon kay Sen. Bong Go, ang pagsulpot ng mga community pantries ay pagpapatunay na buhay ang bayanihan sa panahon ng krisis kaya’t dapat ay walang kulay at ang lahat ay magtulungan, at higit sa lahat ay huwag magsisihan, magsiraan at maglamangan.

Mabuti pa si Sen. Go na kilalang dikit kay P-Duterte ay may katuturan ang sinasabi kaysa kina Dino, Badoy at Parlade, period!