COCO, GUSTONG MAGBIGAY NG TRABAHO SA MGA TAGA-SHOWBIZ

ni Reggee Bonoan - @Sheet Matters | December 3, 2022

Sinadya ni Coco Martin na gumawa ng pelikulang pang-Metro Manila Film Festival ngayong taong 2022 para tulungang makabangon ang movie industry na mahigit dalawang taong lugmok dahil sa COVID 19 pandemic.

Kahit na nagbukas na ulit ang mga sinehan ay hindi pa rin 100% bumabalik ang manonood at kung may manonood man ay sa foreign films lang, paano naman ang local films?

Hindi naman maitatanggi na tuwing MMFF ay isa ang pelikula ni Coco sa top 3 na kumikita. Kaya ang hiling din ng aktor ngayong "Balik Saya ang MMFF 2022" ay sana, panoorin lahat ang mga entries para makabalik ang local industry at matulungan ang maliliit na taong taga-production.

Ito ang sinasalaminan ni Coco nang maisip niya ang concept ng Alabyu with an Accent dahil tungkol ito sa mga kababayang Pinoy na nakatira sa ibang bansa.

Sa mediacon ng pelikulang entry ng Star Cinema/ABS-CBN Productions para sa MMFF 2022 ay nagkuwento siya.

“Actually, naging inspirasyon ko (sa pelikula) ‘yung struggling days ko kasi nu’ng araw na nagsisimula ako, wala sa aking naniniwala dahil hindi ako artistahin, ang liit ko, bulol ako, as in jologs, talagang wala sa bokabularyo ko na mag-aartista ako.

“Hanap lang ako nang hanap kung saan ako makakapagtrabaho nang maayos na mabubuhay ko ang pamilya ko. And then, nagkaroon ako ng oportunidad na nakita ko ‘yung field kung saan ako makakapagtrabaho at mag-e-excel ako na parang ito na ‘yung chance para matupad ko na ‘yung pangarap ko na makapag-provide ako nang maayos para sa pamilya ko.

“Nu’ng nakita ko ‘tong trabahong ito (artista), talagang niyakap ko kasi sabi ko (sa sarili), marami akong kakulangan. Sabi ko nga, pinaka-basic, hindi ako gaanong nakakaintindi ng English pero ayaw kong limitahan ang sarili ko.

“Naniniwala kasi ako sa hard work, eh, kaya nu’ng nakapasok na ako rito sa industriyang ito na nagtrabaho ako bilang artista, hindi ako huminto ru’n. Lagi akong nanonood, hindi ako tumatambay sa tent nu’ng nagsisimula ako, lagi akong nasa labas, nanonood ako, tinitingnan ko ‘yung eksena, (kung) paano ba umarte ‘yung magagaling nating artista o veteran actors natin, tapos unti-unti, ginagaya ko, tinitingnan ko ‘yung nuisance nila sa pag-arte, sa pag-deliver nila ng lines.

“And after that, tinitingnan ko na ‘yung mga cameraman, bakit ganu’n ‘yung mga shots nila, ganu’n ang pag-iilaw, gayundin sa mga direktor at gayundin sa mga writers.

“And then, nu’ng dahan-dahan na akong nakakapasok sa production at naiintindihan ko na ‘yung trabahong ginagawa nila, ang sinabi ko sa sarili ko, ang importante, kailangan ng mga Pilipino na lagi kong tinitingnan ang sarili ko sa kanila na ang importante sa atin ay oportunidad.

“Alam ko, may mga taong lalapit sa akin na nanghihingi ng tulong, nakikita ko kasi ‘yung sarili ko sa kanila na dati may trabaho akong two days, tapos anim na buwan wala, nganga!

“Kaya 'pag alam ko po ‘yung mga kaibigan ko o kakilala ko o may artista na medyo nag-i-struggle o nawawalan ng pagkakataon, naaawa ako kasi nga, lagi kong nakikita ‘yung sarili ko kaya ang ginagawa ko, binibigyan ko ng trabaho kasi gusto kong makapagsimula silang muli.

“Lalo na ‘yung mga artistang gustong sumubok, kinukuha ko sila kasi gusto ko kung ano ‘yung nangyari sa akin (umasenso), mangyari rin sa kanila. Kaya ganito ang dedikasyon ko sa trabaho kasi alam ko na minsan lang darating ang ganitong pagkakataon.

“Saka gusto ko, pagtanda ko, maalala ko na ginawa ko ‘yung pinaka-best kasi ang alam kong talent ko, kasipagan kaya iyon ang ginagawa ko,” mahabang kuwento ng tinaguriang Primetime King ng Kapamilya Network.

Anyway, ang Alabyu with an Accent ay entry ng Star Cinema/ABS CBN Productions sa 2022 Metro Manila Film Festival na mapapanood sa December 25 mula sa direksiyon nina Malu Sevilla at Coco bilang si Rodel Nacianceno.

Kasama rin sa pelikula bukod kay Coco sina Jodi Santamaria, Manuel Chua, Michael de Mesa, Jaclyn Jose at Nova Villa.

Join din sina Joross Gamboa, Rochelle Pangilinan, G. Toengi, Rafael Rosell, Donita Rose, Carlo Muñoz, Cheena Crab, Nikki Valdez, Zeus Collins, Neil Coleta, Jojit Lorenzo, Nash Aguas, JJ Quilantang, Iyannah Reyes, Madam Inutz, Jhai Ho, Marc Solis, Jay Gonzaga, John Medina, Bassilyo, Smuglazz at John Estrada.