Casimero, itataya ang korona kontra Butler sa Dubai

ni Gerard Arce - @Sports | October 13, 2021

Muling itataya ni Filipino boxing champion “Quadro Alas” John Riel Casimero ang kanyang World Boxing Organization (WBO) bantamweight title laban kay Paul “Baby-Faced Assassin” Butler ng England sa Disyembre 11 alinman sa Dubai sa UAE o sa Liverpool sa Inglatera sa tila mas mababang kita.

Kasunod ng pagpapatawag ng WBO ng purse bid para sa sunod na title defense ng 31-anyos mula Ormoc City, maaaring makuntento muna ito sa mas mababang papremyo laban sa dating IBF 118-pound titlist matapos mapagwagian ng Probellum ni Richard Schaefer ang rights para i-promote ang mandatory fight nito sa halagang $105,000.

Sa halagang ito, makakakuha ng 75 porsiyento si Casimero sa presyong $78,750, habang mayroon namang $26,250 ang 32-anyos mula Ellesmere Port, England. Patuloy pa ring may namumong gusot sa pagitan nina Casimero (31-4, 21KOs) at MP Promotions President Sean Gibbons kung kaya’t napilitan itong makipagtrabaho muna sa TGB Promotions ni Tom Brown. Hindi nagkasundo sina Brown at ang promotions ni Butler na MTK Global ni Lee Eaton nung Oktubre 7 sa WBO Headquarters sa San Juan, Puerto Rico, kaya’t napunta sa Probellum ang rights ng laban.

“On September 27, 2021, this Committee confirmed receipt of email correspondence by Mr. Lee Eaton of MTK Global, on behalf of WBO Bantamweight Mandatory Challenger Paul Butler. As outlined in our negotiation letter dated September 22, 2021, any of the parties herein may request purse bid proceedings at any time during the negotiations and therefore, the request filed by Mr. Eaton is hereby granted,” ayon sa statement ng WBO hinggil sa purse bid.