BUHOK NI RUFFA, 2 ORAS INAAYOS MAGAYA LANG SI IMELDA MARCOS

ni Nitz Miralles - @Bida | July 18, 2022

Isinabay sa worldwide launching ng official trailer ng Viva Films movie na Maid in Malacañang ang grand presscon ng pelikula ni Director Darryl Yap. Kaya, napanood ng press people ang trailer na may paalalang “Imposibleng Hindi Ka Maapektuhan.”

Controversial ang Maid in Malacañang mula sa story, sa director at ilang cast ng pelikula.

Siguradong magiging controversial din ang showing nito na magsisimula sa August 3 dahil sa magiging feedback ng mga viewers at non-viewers.

May mga nagsabi nang hindi nila panonoorin ang pelikula, pero mas marami ang nagpahayag na panonoorin nila.

Napansin ng mga netizens ang make-up nina Cesar Montano at Ruffa Gutierrez na gumaganap sa role nina the late President Ferdinand Marcos at dating First Lady Imelda Marcos. Ginaya kay FM ang buhok ni Cesar at pati yata ang eyebags ng dating pangulo ay ginaya rin.

Sabi ni Cesar sa interview ni Dolly Anne Carvajal, “The toughest part about portraying FM is the short time given to prepare for it. It’s harder than my previous role as Jose Rizal. It’s the greatest challenge of my life as an actor. I like the way Direk Darryl wrote the script. It’s full of spice.”

Nai-tweet ni Ruffa Gutierrez ang “It takes 2 hours just to do my hair. I need a bonggang hot oil treatment after I'm done shooting. Grabe the tease and hairspray.”

Ang kapalit ng hairspray at tease, nagaya niya ang signature hair ni former First Lady Imelda Marcos na kanyang ginagampanan.

Sa interview pa rin ni Dolly Anne, ayon kay Ruffa, “Madame Imelda has always been one of my style icons, so I am thrilled to be portraying her. I like how she displays grace under pressure.”

Nabanggit naman ni Direk Darryl na lahat ng artists at staff ay pumirma sa NDA para maiwasan ang paglabas ng kahit anong material na walang pahintulot ang management. In fairness, lahat ay sumunod sa kanilang pinirmahan.