ni Rohn Romulo @Run Wild | February 24, 2023
Mukhang totoo ngang pinagbawalan nang magpaseksi si David Licauco, na tiyak na ikalulungkot ng mga beki at nagpapantasya sa 'Pambansang Ginoo'.
Dahil nga sa tagumpay ng Maria Clara at Ibarra, minahal at kinagiliwan si David sa pagganap niya bilang si Fidel at may nabuo pang love team nila ni Barbie Forteza.
Inalis na raw si David sa Bench Body kung saan kasa-kasama niya ang kapwa-Kapuso hunk actors na sina Derrick Monasterio at Paul Salas, na naka-briefs na talaga namang pinagpiyestahan.
Kaya namnamin na ang sexy photos ni David dahil hindi na raw ito makikitang naka-underwear sa mga billboards, lalo pa nga't next month na ang summer campaign.
At sa newest solo billboard ads ni David sa Guadalupe, pa-wholesome na nga ang pictorial niya from daring dahil nakasuot siya ng puting sando at pantalon para sa denim line ng Bench.
Sa Instagram post ni David, ibinahagi niya ang billboard at nagpapasalamat sa kasikatang tinatamasa ngayon.
"Come pass by EDSA Guadalupe and take a [photo] of BENCH's billboard!" caption niya.
Mukhang iiwanan na niya kay Derrick ang pagpapa-sexy sa underwear shoots, bagama't may mga photos pang lalabas na magkasama ang dalawang hunks.
Sa tingin din namin, bigla rin niyang naangatan sa kasikatan sina Derrick at Paul.
Samantala, sakto rin ang launch ng BlueWater Day Spa kamakailan kay David bilang celebrity endorser kasama ang mga beauty queens na sina Tracy Perez, Gwendolyn Fourniol, Alison Black, Ashley Montenegro, Ingrid Santamaria at Beatriz Mclelland.
Sa naturang spa na lang muna siguro maghuhubad at magpapakita ng kanyang sexy body si David, dahil off-limits muna at kailangang maging wholesome. But for sure, magkakaroon din ng solo billboard si Fidel para rito at dapat lang samantalahin habang pinag-uusapan pa.
At dahil nga sa tagumpay ng Team FiLay, magsasagawa sina David at Barbie ng Thanksgiving Fans Day sa Pebrero 26 sa Ayala Malls Clover Leaf.