BARBIE, TANGGAP NG MADLANG PIPOL NA MAGING HOST SA IT’S SHOWTIME

ni Nitz Miralles @Bida | July 3, 2023

Mukhang masusundan ang pagge-guest ni Barbie Forteza sa It’s Showtime dahil nagustuhan siya ng madlang pipol na loyal viewers ng show. Ang dami ring nag-agree na Kapamilya fans sa tweet ni Vice Ganda na “Bagay si Barbie sa Showtime. I love her vibe.”

Ilan sa mga comments sa tweet na ito ni Vice ay “Make this possible,” “Agree,” “Grab this opportunity to make her as guest host or reg host, ‘yung energy niya, walang makakapantay.”

May nag-comment pa ng “Pang-noontime show si Barbie at bagay ang kakulitan niya sa Showtime. Kunin mo ‘yan, Meme, hahaha!”

May nag-suggest pa na puwedeng mag-duet sina Barbie at Anne Curtis, bardagulan daw sa kantahan.

May nagbiro naman kung sino ang tatanggalin kapag naging regular si Barbie.

Nag-tweet din si Kim Chiu ng “Nice to finally meet you, Barbie,” na sinagot ni Barbie ng “Honored to have shared the dance floor with you po, Captain.”

Sa short convo na ito nina Barbie at Kim, may mga nag-request ng movie collab o kaya’y teleserye.

Kung hindi raw agad mangyayari ang movie at TV collab, dance showdown muna sa It’s Showtime.

Nag-viral din ang pagsigaw ni Barbie ng “What’s up madlang pipol” at nagpalakpakan na ang audience.

Nabanggit din ni Barbie na laging nanonood ng It’s Showtime ang mom niyang si Mommy Amy.